ऑपरेशन सिंदूर: भारतान दिली पाकिस्तानाच्या आतंकवादी संघटणांक जाप

भांगरभूंय | प्रतिनिधी

पाकिस्तानाचेर एअर स्ट्रायक: २३ मिनटांनी मिशन पुराय; १००परस चड आतंकवादी काबार

निमाणें भारतान पाकिस्तानाच्या आतंकवादी संघटणांक जाप दिली. मंगळारा मध्यानराती उपरांत भारतीय हवाई दळान पाकिस्तान आनी पीओके म्हणल्यार पाकव्याप्त काश्मीराक हवाई हल्ले केले. मध्यानरातीं १:२८ वरांचेर ऑपरेशन सिंदूर सुरू जालें आनी १:५१ वरांचेर तें येसस्वीय जालें. भारतीय सैन्यान २३ मिनटानीच आतंवादी अड्डे केले काबार.
ह्या हल्ल्यांत ७ शारांतल्या ९ आतंकवादी अड्ड्यांचेर हल्लो केलो. आतां मेरेन मेळिल्ले म्हायती प्रमाण, हातूंत १०० परस चड आतंवादी सोपले.

भारताची ही प्रत्युत्तरात्मक कारवाय पहलगाम हल्ल्याच्या १५ दिसां उपरां केल्या आनी हाका ’ऑपरेशन सिंदूर’ अशें नांव दिलां. हें नांव त्या बायलांक समर्पीत आसा जांच्या घोवांक २२ एप्रिलाक आतंकवाद्यांनी मारले.
पाकिस्तानाच्या इंटर-सर्व्हिसेस पब्लीक रिलेशन्स (ISPR) चे संचालक लेफ्टनंट जनरल अहमद शरीफ चौधरी हांणी, भारतान २४ क्षेपणास्त्रां उडयल्यांत. वृत्तसंस्था ANI नच्या सुत्रांनी सांगलें, प्रधानमंत्री मोदी रातभर ऑपरेशन सिंदूरचेर लक्ष दवरून आसले.
भारतान केल्ल्या हल्ल्या वेळार बहावलपुरांत २०० परस चड आतंकवादी आशिल्ले, अशी म्हायती मेळ्ळ्या. जाल्यार मुरिदकेंत १२० परस चड आतंकवादी आशिल्ले. मुजफ्फराबादांत ११० ते १३० आतंवादी, कोटली ७५ ते ८०, सियालकोट ९० ते १००, गुलपूर ७५ ते ८०, भिंबर ६० परस चड आतंकवादी, जाल्यार चाक अम्रू हांगा ७० ते ८० आतंकवादी आशिल्ल्याची खबर मेळ्ळ्या.

भारतान ह्या ९ सुवातांचेर केलो एअर स्ट्रायक

१. बहावलपूर
जैश-ए-मोहम्मदचें मुख्यालय
आंतरराष्ट्रीय शिमे पसून १०० किमी अंतराचेर

२. मुरीदके
लष्कर-ए-तैयबाचें मुख्यालय
शिमे पसून ३० किमी अंतराचेर

३. सवाई
लश्कर-ए-तोयबाचो अड्डो
शिमे पसून ३० कि.मी. पयस

४. गुलपूर
आतंकवाद्यांचो अड्डो
ताबो शिमे पसून ३५ कि.मी. पयस
हल्ल्या वेळार ८० आतंकवादी

५. बिलाल
जैश-ए-मोहम्मदचें हवाई तळ
शिमे पसून ३५ कि.मी. पयस

६. कोटली
नियंत्रण शिमे पसून १५ किमी अंतराचेर
५० आतंकवादी आशिल्ले

७. बरनाला
आतंकवाद्यांचो अड्डो
शिमे पसून १० कि.मी. पयस

८. सरजाल
जैश-ए-मोहम्मदचो अड्डो
शिमे पसून ८ कि.मी. पयस

९. महमूना
हिजबुल्लाचें प्रशिक्षण केंद्र
शिमे पसून १५ कि.मी. पयस

संरक्षण मंत्रालयान कितें म्हणलें?
ऑपरेशन सिंदूर उपरांत संरक्षण मंत्रालयान म्हणलें, आमची कारवाय केंद्रांत, स्पश्ट आनी कसलोच वाद निर्माण करपा पसून वाटवल्या. आमी खंयच्याच पाकिस्तानी सैन्य ठिकाणांचेर हल्लो करूंक ना. भारतान सुवातांची निवड केली आनी त्यो उध्वस्त करपाक बरीच धिटाय दाखयली. पहलगाम आतंकवादी हल्ल्यांत २५ भारतीय आनी एका नेपाळी नागरिकांक मारिल्ले. संरक्षण मंत्रालयाच्या वक्तव्या प्रमाण आमी आमची कटिबद्धताय निश्‍चीत केल्या. पहलगाम आतंकवादी हल्ल्याक जापसालदार आशिल्ल्यांक जाप दितले.