भांगरभूंय | प्रतिनिधी
पत्रकार परिशदेंत दिल्ली पुराय म्हायती वाचात…..
नवी दिल्ली, खबरां संस्था : जम्मू- काश्मीरांतल्या पहलगामांत आतंकवाद्यांनी २२ एप्रीलाक भिरांकूळ हल्लो केलो. ह्या हल्ल्यांत २६ पर्यटकांक मरण आयलें. उपरांत देशभर तिडकीचें ल्हार पातळ्ळें. ह्या हल्ल्याची जाप पाकिस्तानाक दिवची अशी मागणी सेगीत चालूच आसली. आयज (बुधवारा) भारतान निमाणें पाकिस्तानाचेर हवाई हल्लो करून खर प्रतिसाद दिलो. भारतान ९ सुवातींचेर हवाई हल्लो केलो. तातूंत भारतान पाकिस्तानांतले आतंकवादी अड्डे नश्ट केले. ह्या पुराय ऑपरेशनाची म्हायती नारी शक्तीन दिली.
‘ऑपरेशन सिंदूर’ उपरांत लश्करान पत्रकार परिशद घेवन हे विशीं म्हायती दिली. परराष्ट्र सचिव विक्रम मिस्री, हवाई दळांतली व्योमिका सिंग आनी तांचे वांगडा लश्करांतली कर्नल सोफिया कुरेशी हांणी हे मोहिमे विशीं म्हायती दिली.
विक्रम मिस्री हांणी सांगलें, जम्मू- काश्मीरांतल्या वाडट्या पर्यटनाचेर आनी सुदारपी अर्थवेवस्थेचेर पाकिस्तानान घाव घालपाचो हो यत्न पहलगामांत जाला. आमच्या लोकांची उदरगत थांबोवप आनी आमचें एक राज्य सगळ्या अर्थान फाटीं हाडप हो ह्या हल्ल्याचो हेत आशिल्लो, हें आमी जाणून घेवंक जाय. ह्या हल्ल्यांत पाकिस्तानाचो वांटो स्पश्ट आसा, पहलगाम हल्ल्यांतल्या आतंकवाद्यांक ख्यास्त जावप गरजेचें आशिल्लें. त्या हल्ल्याची जापसालदारकी टीआरएफान घेतल्या. आमच्या गुप्तचर संस्थांनी ह्या हल्ल्यांत वांटेकार जाल्ल्या लोकां विशीं म्हायती एकठांय केल्या. पाकिस्तानाक आतंकवाद्यां खातीर सुरक्षीत आलाशिरो म्हूण संवसारभर मान्यताय मेळ्ळ्या अशी म्हायती तांणी दिली.
पहलगामच्या पंदरा दिसांनी हवाई हल्लो जाले उपरांत लेगीत पाकिस्तानान आतंकवाद्यां आड कसलीच कारवाय करूंक ना. तांणी आरोप केल्यात. भारताचेर आनीक हल्ले जावंक शकतात. देखून ताचे आड उपाय करप म्हत्वाचें. भारतान आतंकवाद सोंपोवपाक जाप दिल्या. आतंकवादी आमच्या जम्मू-काश्मीरची उदरगत आडावपाक सोदतात. टीआरएफ ही पाकिस्तानी लश्कराक जोडिल्ली संघटना. पहलगाम हल्ल्यांत टीआरएफचो हात आसा अशी म्हायती श्री. मिस्री हांणी दिली.
निरपराधी नागरीकांची काळजी घेतली
हे कारवाये विशीं म्हायती दितना लश्कराची कर्नल सोफिया कुरेशी हांणी सांगलें, पहलगामांत जाल्ल्या आतंकवादी हल्ल्यांत बळी पडपी लोकांक न्याय दिवपा खातीर ‘ऑपरेशन सिंदूर’ सुरू केल्लें. हे कारवायेंत आतंकवादी लिपोवपाच्यो णव सुवातो नश्ट केल्यात. ऑपरेशन सिंदूर वेळार एकाय निरपराधी नागरिकाक कांयच जावचें न्हय हाची जतनाय आमी घेतली. मार्च २०२५ वर्सा जम्मू- काश्मीरांत चार सैनिकांक मरण आयलें. मुंबयच्या आतंकवादी हल्ल्यांत वांटो घेवपी आतंकवाद्यांचे लिपोवपाचे आनी प्रशिक्षणाचे सुवातेरूय निशाणो केलो. मरकज सुभानल्लाह हे जैश-ए-मोहम्मदचे मुख्यालय आशिल्लें. हांगा आतंकवाद्यांक प्रशिक्षण दिताले. खंयच्याच लश्करी सुवातांक लक्ष्य करूंक ना आनी एकाय नागरिकांक कांय जावंक ना, अशी माहिती कुरेशी हांणी दिली. ह्या वेळार तांचें टार्गेट आशिल्लीं आनी त्यो सुवातो उध्वस्त जाल्ल्याचेय फोटो दाखयले.
कारवायेची म्हायती कर्नल कुरेशी आनी विंग कमांडर व्योमिका सिंग ह्या दोन बायलां अधिकार्यांनी दिली. सोफिया कुरेशी हांणी सांगलें, आमी पीओके आनी पाकिस्तानाच्या मेळून वट्ट ९ आतंकवादी अड्ड्यांचेर हल्लो केला. ह्या हल्ल्या मजगतीं, आमी थारायिल्लें आनी खात्री केल्या की फकत आतंवाद्यांकूच सोंपयले आनी खंयच्याच नागरिकांचें लुकसाण जालें ना. आमी कोटली अब्बासांतले आतंकवादी तळ उध्वस्त केलें. हांगा सुमार १५०० आतंकवाद्यांक प्रशिक्षण दिल्लें. तशेंच, पाकिस्तानी पंजाबांतल्या बहावलपूर आनी महमूना झोया हांगच्या आतंकवाद्यांचे अड्डे उध्वस्त केले.
कसाबला प्रशिक्षण मेळिल्ले आतंकवादी अड्डेय केले काबार
इतलेंच न्हय मुरीदकेचे मरकज तैयबाय उध्वस्त केलें. हें लश्कराचें मुख्यालय आशिल्ल्याचें म्हणटात आनी आतंकवादी अजमल कसाबाकूय हांगच्यान प्रशिक्षण मेळिल्लें. सोफिया कुरेशी हांणी सांगलें, आमी अचकीत हल्लो केलो आनी हो हल्लो सरळ आतंकवादी लिपोवपाच्या अड्ड्यांचेर आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
