भांगरभूंय | प्रतिनिधी
भूषम कुमार आनी विवेक अग्निहोत्री हांणी ‘ऑपरेशन सिंदूर’ह्या चित्रपटाची घोशणा केल्या. हो चित्रपट पहलगाम आतंकवादी हल्ल्या उपरांत पाकिस्तान आनी पाकिस्तानव्याप्त काश्मिरांत भारतीय सैन्यान केल्ले कारवायेचेर आदारीत आसतलो.
हो चित्रपट लेफ्टनंट जनरल के. जे. एस. ढिल्लो (निवृत्त) हांच्या ‘ऑपरेशन सिंदूर : द अनटोल्ड स्टोरी ऑफ इंडियाज डीप स्ट्रायक्स इनसायड पाकिस्तान’ ह्या पुस्तकाचेर आदारीत आसतलो. हाचें दिग्दर्शन विवेक अग्निहोत्री करतलो.
ह्या प्रकल्पाची निर्मिती भूषण कुमार हांची टी- सिरीज आनी अग्निहोत्री हांची आय एम बुद्धा प्रॉडक्शन्स संयुक्तपणान करतली. निर्मात्यांच्या म्हणण्या प्रमाण, चित्रपटांत भारताची ताकद, धैर्य आनी अचूक कारवाय दाखयतले.
ऑपरेशन सिंदूर ही भारतीय सैन्यान 6-7 मे 2025 चे राती पाकिस्तानांतल्या आतंकवादी सुवातांचेर केल्ली प्रतिहल्लो कारवाय आशिल्ली. हें ऑपरेशन 22 एप्रील 2025 ह्या दिसा पहलगामांत जाल्ल्या आतंकवादी हल्ल्या उपरांत केल्लें, तातूंत 26 लोकांक मरण आयिल्लें. ऑपरेशन सिंदूरचो उद्देश हल्ल्या खातीर जापसालदार आशिल्ल्या आतंकवादी सुवातो नश्ट करपाचो आशिल्लो.
चित्रपटा विशीं भूषण कुमार हांणी म्हणलां, ही कथा स्वताच मुखार आयल्या आनी ती जापसालदारकेन दाखोवप म्हत्वाचें आसा. ताणें हाका देशांतल्या एका म्हत्वाचे घडणुकेची नोंद करपाचो यत्न आसा. जाल्यार दिग्दर्शक विवेक अग्निहोत्री हांणी म्हणलां, चित्रपटा खातीर भारतीय लश्कराच्या विवीध विभागां वांगडा खोलायेन संशोधन केलां, जाका लागून घडणूक योग्य तरेन समजून घेवपाक मेळटली.
अग्निहोत्री हांणी अशेंय सांगलें, तांची ही कथा योग्य आनी मूळ स्वरुपांत प्रेक्षकां मेरेन पावोवपाचो यत्न आसा. तांणी हें गंभीर आनी अचूक पद्दतीन सादर करपा विशीं सांगलें. चित्रपटा कडेन संबंदीत हेर म्हायती बेगिनूच जाहीर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
