भांगरभूंय | प्रतिनिधी
नवी दिल्ली, खबरां संस्था ः सायबर स्पेसांत ऑनलायन फटवणूक जाल्ल्यांक बँकींग वेवस्थाय फटोवपाक लागल्या. फाटल्या 3 वर्सांत सायबर फटवणूकी पसून वाटावल्ल्या 87.88 कोटी रुपयां मदले फकत 4.15 कोटी रुपया म्हणल्यार फकत 5% रक्कम गिरायकांक परत मेळ्ळ्या. उरिल्ली रक्कम बँकांनी तशींच आसा.
डिजिटल पेमेंट विशींच्या संसदीय अहवाला प्रमाण, वट्ट सायबर फटवणूक रक्कमेंतल्यान उण्यांत उणें 10% पयशे आडायतात पूण गिरायकांक ते परतून मेळना. डिजिटल फटवणूकांचे पयशे फकत न्यायालयीन आदेशा वरवीं वसूल करूं येतात अशें अधिकाऱ्यांनी सांगलें.
आनिकूय एक समस्या म्हळ्यार सायबर फटवणूक आनी कायदेशीर पेमेंट हांचे मदीं फरक करप कठीण कारण फटवपी खऱ्या आनी फटींग वेव्हाराची भरसण करतात. संसदीय समितीच्या अहवाला प्रमाण, 2021 वर्सा 547 कोटींच्या सायबर फटवणूकांतल्यान बँकांनी 3.64 कोटी रुपया आडायले, पूण गिरायकांक एकूय पयशो परत मेळूंक ना.
सायबर फटवणूकांनी 128 टक्क्यांनी वाड
फकत फाटल्या दोन वर्सांत सायबर फटवणूक घडणुकांनी 128 टक्क्यांनी वाड जाल्या. ह्या दोन वर्सांत सायबर फटवणूक 2,296 कोटी रुपयां वयल्यान 5,574 कोटी रुपया मेरेन वाडल्या.
बँकांच्या व्हर्च्युअल खात्या वरवींय सायबर फटवणूक वाडता
सायबर फटवणूकीच्या नव्या मॉडेला विशीं गवाय दितना गृह मंत्रालयाच्या एका अधिकाऱ्यान सांगलें, फटवणूकेंत व्हर्च्युअल बँक खात्यांचो वापर नेटान वाडला. बँक चालू खात्या वरवीं वा एस्क्रॉ खात्या वरवीं जायतीं व्हर्च्युअल खातीं उगडटात. कायदो पाळपी एजन्सींक तांच्या वेव्हाराची कसलीच म्हायती ना. गुंतवणूक भानगडींनी आनी रिणाच्या फटवणुकेंत ह्या व्हर्च्युअल खात्यांचो व्हड प्रमाणांत वापर जावपाक लागला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
