भांगरभूंय | प्रतिनिधी
नवी दिल्ली, खबरां संस्था: कांय दिसां आदीं रेल्वेच्या ऑनलायन बुकींग पोर्टला विशीं एक म्हायती उजवाडाक आयली. हे म्हायती प्रमाण रक्ताचें नातें सोडून हेर व्यक्ती, इश्ट, परिवारा खातीर रेल्वेची तिकेट बूक केल्यार दंड आनी बंदखणीची शिक्षा जातली अशी शिटकावणी दिल्ली. जाका लागून प्रवाशां मदीं खूब गोंदळ पळोवपाक मेळ्ळोे. चड करून मनशाचो आयआरसीटीसी आयडी हेर लोक तिकीट बुक करपा खातीर व्हड प्रमाणांत वापरतात. पूण हे खेपे रेल्वेच्या ह्या कथित सुचवणेक लागून प्रवासी गोंदळांत पडले.
चुकीच्या सुचोवण्यांक लागून जाल्लो गोंदळ पळयल्या उपरांत निमाणें आयआरसीटीसीच्या अधिकृत एक्स खात्या वरवीं रेल्वे खात्या वतीन कांय गजाली स्पश्ट केल्यात. भारतीय रेल्वेच्या म्हणण्या प्रमाण खंयच्याय सामान्य नागरिकांक तिकेट बुकींग आयडी वा आयआरसीटीसी खात्या वरवीं हेरां खातीर तिकेट बुक करपाक मेळटा. वेगवेगळीं आडनांवां आसलीं तरी ई-तिकेट बुकींगांत कसलोच त्रास जावचो ना अशें रेल्वेन स्पश्ट केलां. इतलेंच न्हय तर सध्याची व्हायरल खबर फटीची आसा अशें रेल्वे खात्यान सांगलें.
अचूक गजाल मुखार हाडून रेल्वे कंपनीन सांगलें…
तिकीट आरक्षण पद्दतीचेर निर्बंध घालपा संबंदीं उजवाडाक आयिल्ली खबर फटीची आसा आनी वेगवेगळ्या आडनांवां संबंदीं तिकीट बुकींग करपाचे निर्बंधा विशींची खबर चुकीची आसा अशें तांणी सांगलें. अशा बातम्यां विशीं काळजी घेवप अपेक्षीत आशिल्ल्यान, आयआरसीटीसी वरवीं रेल्वे बोर्डाच्या मार्गदर्शक सुचवण्यां प्रमाण तिकीट बुक करतले.
रेल्वेच्या नेमां प्रमाण व्यक्ती आपल्या युझर आयडी वरवीं इश्ट, कुटुंब वा नात्यांतल्या लोकां खातीर तिकेट बूक करूंक शकता. दर म्हयन्याक एका आयडी वरवीं १२ तिकेटी बूक करूं येतात. आधार कार्ड वापरप्यांक म्हयन्याक २४ तिकेटी मेरेन बुकींग करपाक मेळटा, फकत एकाच प्रवाशाक आधार प्रमाणीत जावपाची अपेक्षा आसा. व्यक्तीच्या खाजगी वापरपी आयडींतल्यान काडिल्ली तिकेट वेवसायीक विक्री खातीर उपलब्ध आसची ना, आनी रेल्वे कायदो, १९८९ च्या कलम १४३ खाला कायदेशीर कारवाय करपाक हो कायदो जापसालदार आसतलो.’
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
