भांगरभूंय | प्रतिनिधी
काणकोण पोस्टा वतीन ऑनलायन पद्दतीन मागयिल्लें पार्सल
पणजी: केंद्रीय नार्कोटीक कंट्रोल ब्युरोच्या (एनसीबी) गोंय विभागान काणकोण पोस्टा वतीन ऑनलायन पद्दतीन मागयिल्लें हिरोयन, हशीश आनी गांजो जप्त करून ड्रग्स तस्करी उजवाडा हाडली. ह्या प्रकरणांत एनसीबीन ऑलिव्हिया निकोल न्यूमन ह्या विदेशी बायले सयत मुखेल दुबावीत जिनेश पारेख, अमेय विजय त्रिभुवन ह्या तिगांक अटक केल्या. अटक केल्लो जिनेश पारेख हो मुफ्त इंटरनॅट ह्या कंपनीचो जोड संस्थापक आसा. जाल्यार अमेय विजय त्रिभुवन हो आनीक एक कंपनीचो संचालक आसा.
केंद्रीय नार्कोटीक कंट्रोल ब्युरोच्या (एनसीबी) गोंय विभागा कडल्यान मेळिल्ले म्हायती प्रमाण काणकोण पोस्ट ऑफिसांत 22 मार्च दिसा आयिल्ल्या तीन पार्सलांतल्यान ड्रगस तस्करी केल्ल्याची म्हायती एनसीबीच्या एका अधिकाऱ्याक 31 मार्च दिसा मेळिल्ली.
ते प्रमाण एनसीबीचे उपसंचालक नितीन गवाल आनी अधिक्षक सुजीत कुमार सिंग आनी अजय कुमार हांच्या मार्गदर्शना खाला निरिक्षक मोहन राणे फ्रान्सिको झेवियर, शिपाय धमेंद्र कुमार मीणा आनी ड्रायव्हर शिज्जीन एन. के. ह्या पंगडान 1 एप्रील 2025 दिसा सकाळीं पोस्ट ऑफिसांत गेले. उपरांत पंगडान नगरशें काणकोण हांगासरल्या एका इमारतींत रावपी बायलेच्या नांवार तीन पार्सलां आयिल्ल्याची म्हायती मेळ्ळी. ते प्रमाण तातूंतलें एक पार्सल आसाम सावन मागयिल्लें. ताची झडटी घेतली तेन्ना तातूंत हनुमानाचो फोटो आशिल्लो. ताची खोलायेन चवकशी केली तेन्ना त्या फोटो फ्रेमींत 1.205 ग्राम हिरोयन सांपडलें.
उपरांत दुसरें पार्सल आनी तिसरें पार्सल स्विर्त्झलॅण्ड सावन मागयिल्लें. त्या दोनूय पार्सलां मदीं सॅनिटरी पॅडां मागयिल्लीं. ताची झडटी घेतली तेन्ना 22,606 ग्राम हशीश आनी 2.934 ग्राम उंचेल्या दर्जाचो गांजो सांपडलो. हें सगलें ड्रग्स एनसीबीन जप्त केलें. उपरांत एनसीबीन घुंवळे वखदां विरोधी कायद्या खाला गुन्यांव दाखल करून तपास सुरू केलाे.
ह्याच वेळार पार्सल व्हरपा खातीर एके बायलेन पोस्टमना कडेन संपर्क सादिल्ल्याचें मुखार आयलें. उपरांत एनसीबीन संबंदीत बायलेची चवकशी सुरू केली. तशेंच ते बायले संबंदी लुकआवट नोटीस जारी केली. ह्याच वेळार मुंबय आंतरराष्ट्रीय विमानतळार 23 एप्रील दिसा ऑलिव्हिया निकोल न्यूनम हे स्विस बायलेक आपल्या देशांत परतून वतना ताब्यांत घेतली.
उपरांत ते बायलेक एनसीबीचे सुवादीन करून गोंयांत हाडून अटक केली. तिची चवकशी केली तेन्ना तिका जिनेश पारेख हाणें पार्सल हाडपा खातीर सांगिल्ल्याची म्हायती दिली. एनसीबीन जिनेश पारेख आनी अमेय विजय त्रिभुवन ह्या दोगांक अटक केली. अटक केल्ल्या तिगांक काणकोण पयलो वर्ग न्यायालयान न्यायालयीन कोठी दिली.
मजगतीं तिगांकूय न्यायालयान सशर्त जामीन मंजूर केला. मजगतीं, जामिनाच्या अटीच्यो अटी पुराय जावंक नाशिल्ल्यान ते न्यायालयीन कोठयेंत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
