भांगरभूंय | प्रतिनिधी
पणजी: तिसवाडी म्हालांतल्या एका 72 वर्सा पिरायेच्या निवृत्त मनशाक गोंयची सगल्यांत व्हड ऑनलायन गुंतवणूक घोटाळ्यांत 4.74 कोटी रुपया व्हगडावचे पडिल्ले. ह्या प्रकरणांत गोंय पुलिसांच्या सायबर विभागान अविश्कर देविदास सुरडकर (जालना, महाराष्ट्र) ह्या दुबाविताक अटक केली. दुबाविताच्या बँक खात्यांत वयले रकमेंतले 80 लाख रुपया जमा जाल्ले. अशे तरेच्या हेर राज्यांतल्या खुबश्या गुन्यांवांत वांटो आसून तांच्या खात्यांत 13.10 कोटी रुपया जमा जाल्ल्याचें मुखार आयलां.
ह्या प्रकरणांत तिसवाडीच्या एका 72 वर्सां पिरायेच्या निवृत्त मनशान कागाळ दाखल केल्या. ते प्रमाण ही घडणूक ऑगस्ट 2025 च्या मध्यांत घडली. सोशल मिडियाचेर जायरात केल्ल्या बनावट इनिशियल पब्लीक ऑफरींग (आयपीओ) गुंतवणूक येवजणे वरवीं हांयस दाखयिल्लें. फटवणूक करप्यांनी PAYTM Money as “PTM-QIB” पात्र संस्थात्मक खरेदीदार (क्यूआयबी) म्हूण वळख निर्माण केली. ज्येश्ठ नागरिकाक गुंतवणूक ऑफर कायदेशीर आशिल्ल्याचें आनी बरो परतावो दितले अशें पटोवन दिवपाक ते येसस्वी थारले. त्या मनशान उपरांत खुबश्या हप्त्यांनी पयशे हस्तांतरीत करून गुंतवणूक केली.
हप्त्यां मदीं गुंतवणूक पुराय जाले उपरांत प्रतिसाद मेळप बंद जालो आनी कसलोच परतावो मेळूंक नाशिल्ल्यान ज्येश्ठ मनशाक आपली फटवणूक जाल्ल्याचें समजलें.
तांणी कागाळ दाखल केले उपरांत कागाळीची दखल घेवन सायबर विभागाचे पुलीस निरिक्षक दीपक पेडणेंकार हांणी अनवळखी वॉट्सअॅप मोबायल क्रमांकधारका आड भारतीय न्याय संहितेच्या कलम आनी म्हायती आनी तंत्रज्ञान कायद्याच्या कलमा खाला गुन्यांव दाखल करून तपास सुरू केलो. ह्याच वेळार वयले रकमे पैकीं 80 लाख जालना महाराष्ट्र हांगा बँक खात्यांत जमा जाल्ल्याची म्हायती सायबर विभागाक मेळ्ळी.
ते प्रमाण, अधिक्षक राहुल गुप्ता, सहाय्यक अधिक्षक बी. व्ही. श्रीदेवी हांच्या मार्गदर्शना खाला निरिक्षक दीपक पेडणेंकार हांच्या फुडारपणा खाला उपनिरिक्षक शेर्वीन डिकॉस्टा, हवालदार विराज नार्वेंकार आनी कॉन्स्टेबल विरेंद्र वाडकार हांचो पंगड महाराष्ट्रांत धाडून दिलो. उपरांत पंगडान देविदास सुरडकर हाका ताब्यांत घेवन गोंयांत हाडलो.
अटक केल्ल्या दुबाविताच्या बँक खात्याची तपासणी केली तेन्ना ताच्या हेर राज्यांतल्या खुबश्या गुन्यांवांनी वांटो आसून ताच्या खात्यांत 13.10 कोटी रुपया जमा जाल्ल्याचें समजलें.
ह्याच वेळार एका बायलेच्या बँक खात्यांत वयल्या गुंतवणूक घोटाळ्यांतले 30 लाख जमा जाल्ल्याचें मुखार आयलें. ते प्रमाण सदर बायलेक नोटीस दिवन तिका चवकशेक हजर रावपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
