भांगरभूंय | प्रतिनिधी
मडगांव: दक्षीण गोंयांतल्या केळशेच्या थळाव्या टॅक्सीकारांनी ऑनलायन टॅक्सी अॅग्रिगेटर्साच्या वाडट्या हस्तक्षेपा आड पवित्रो घेतला. रॅडिसन ब्लू टुरिस्ट टॅक्सी असोसिएशनान दक्षीण गोंय पुलीस अधिक्षकांक निवेदन भेटोवन कारवाय करपाची मागणी केल्या.
थळाव्या टॅक्सीकारांनी ऑनलायन टॅक्सी अॅग्रिगेटर्सां आड कोलवें पुलिसां सयत दक्षीण गोंय जिल्हो पुलीस अधिक्षकांक निवेदन सादर केलें. ह्या वेळार थळाव्या टॅक्सीकारां सयत आमदार व्हेंझी व्हिगएश, केळशीचे सरपंच डिक्सन वाझ हांचे सयत हेर मानेस्त हाजीर आशिल्ले.
तांणी निवेदनांत म्हणलां की हॉटेल वाठारांतल्या पर्यटकांक व्हरपा खातीर ऑनलायन टॅक्सी अॅग्रिगेटर्साचे चालक येतात. हाका लागून थळाव्या टॅक्सीकारांक वर्सानवर्साच्या टॅक्सी स्टॅण्ड पद्दतीक धक्को बसत आसा. वेवसायाचेर हावळ येत आशिल्ल्यान हॉटेल वाठारांत सेगीत झगडीं जावपाचे प्रस्न उप्रासतात. खूबशे ऑनलायन टॅक्सी चालकां कडेन वैध टॅक्सी बॅज वा परमीट नाशिल्ल्याचो आरोप असोसिएशनान करतना हाका लागून पर्यटकांचे सुरक्षेचो प्रस्न निर्माण जावंक शकता अशें म्हणलां.
पुलिसांनी हाची खोलायेन चवकशी करून ऑनलायन टॅक्सीकारांच्या बेकायदो हालचालींक आळाबंद हाडचो अशी मागणी केली. थळाव्या चालकांच्या हक्कांचे संरक्षण करून हॉटेल वाठारांतली शांतताय सुवेवस्था कायम राखची अशी विनंती केल्या. हॉटेला भायर वादाचे प्रसंग परतून सुरू जाल्ल्यान टॅक्सी वेवसायांतलो पोरणो संघर्श आतां परतून पेटपाची चिन्नां आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
