भांगरभूंय | प्रतिनिधी
चेन्नय, खबरां संस्था ः देशांत गुन्यांवांनी बरीच वाड जायत आसा. सदांच एक- एक नवें प्रकरण उजावाडाक येवपाक लागलां. अशीच एक ऑनर किलिंगाची धक्को दिवपी घडणूक मदुराय जिल्ह्यातल्या तिरुमंगलम हांगां घडल्या. भयण महालक्ष्मी हिचो सतीश कुमार हाचेर मोग आशिल्ल्यान भाव प्रवीण कुमार हांणे आपलेच भयणीची हत्या केली. ते उपरांत तिचो मोगी सतीश कुमार हाची तकली कापून रस्त्यार दवरली. पुलिसांच्या म्हणण्या प्रमाण महालक्ष्मीचें लग्न वानियानकुलमांत रावपी मनशा कडेन जाल्लें. पूण तांचेमदीं झगडीं जावपाक लागलीं. ते उपरांत महालक्ष्मी आपलो भाव प्रवीण आनी आवय हांचे वांगडा रावपाक लागली.
महालक्ष्मी आनी सतीश कुमार हांचे मदीं पयलीं इश्टागत जाली आनी उपरांत तांचे मदीं मोग जालो. महालक्ष्मीचो भाव प्रवीणाक हो मोग आवड नाशिल्लो. सतीश कुमारा कडेन संबंद दवरचे न्हय अशी शिटकावणी ताणें भयणीक दिल्ली. पूण महालक्ष्मीन ताचें आयकलें ना. देखून मंगळारा प्रवीणान सतीश आनी महालक्ष्मीची हत्या केली. मंगळारा रातीं प्रवीण आनी ताच्या इश्टांनी सतीशाक आडावन ताका धारदार शस्त्रान मारलो आनी तकली कापली देखून ताका मरण आयलें. उपरांत तो घरा आयलो आनी भयणीकय मारली. प्रवीण भयणीक मारतालो तेन्ना ताचे आवयन आडावपाचो यत्न केलो पूण प्रवीणान आवयच्याय हाताचेर चाकू मारलो.
हे घडणुके उपरांत गांवांतल्या लोकांनी पुलिसांक म्हायती दिली. उपरांत महालक्ष्मी आनी सतीश कुमार ह्या दोगांयच्यो कुडी मदुरायच्या जीआरएच हॉस्पिटलांत पोस्टमार्टमा खातीर धाडल्यात. सध्या मेरेन चार हल्लेखोरां मदल्या तीन हल्लेखोरांक पुलिसांनी ताब्यांत घेतल्यात आनी फरारी जाल्ल्या दुबाविताचो सोद चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
