भांगरभूंय | प्रतिनिधी
अहवाल तयार दवरपाची नायट क्लब, बार्रांक अॅडवायजरी
आदेश पाळ्ळो ना जाल्यार आस्थापनां करतले बंद
म्हाल पांवड्या वयल्यो समित्यो 16 डिसेंबर सावन करतल्यो तपासणी
भांगरभूंय । प्रतिनिधी
पणजी : हडफडेमच्या बर्च बाय रोमिओ लेन क्लबाक लागिल्या उज्याचे फाटभुंयेर गोंयांतले नायट क्लब, बार्रां, रेस्टॉरंण्टां, इव्हेंट जावपी आस्थापनांक 7 दिसां भितर सुरक्षा ऑडीट अहवाल तयार दवरपाची अॅडवायजरी जारी जाल्या. सुरक्षा ऑडीट अहवाल नासलो जाल्यार आस्थापन बंद वा परवानो रद्द करपाची कारवाय जातली. आपत्ती वेवस्थापन कायद्या खाला कायदेशीर कारवाय लेगीत जावपाक शकता, अशें सरकारान कळीत केलां. हे विशींचो आदेश येणावळ फांट्यान जारी केला.
सात दिसां उपरांत म्हाल पावंड्या वयल्यो समिती 16 डिसेंबर सावन सुरक्षा ऑडीट अहवालाची तपासणी सुरू करतल्यो. ऑडीट अहवाल तयार नासलो जाल्यार कायद्या प्रमाण कारवाय जातली, अशी म्हायती दोनूय जिल्होधिकाऱ्यांनी दिली.
शेनवारा रातीं बर्च बाय रोमिओ लेन क्लबाक लागिल्या उज्यांत 25 जाणांक मरण आयिल्लें. गुन्यांव नोंद जाल्यान पुलिसांनी तपास सुरू केला. तशेंच सरकारान दंडाधिकाऱ्या वरवीं चवकशीचे आदेश दिल्यात. गरजेचे परवाने तशेंच सुरक्षा ऑडीट अहवाल तयार दवरपाक 7 दिसांची मुजत दिल्या. पुलीस, उजो पालोवपी दळ वा प्रशासना वरवीं 16 डिसेंबर सावन तपासणी सुरू जातली, अशी म्हायती उत्तर गोंयचे जिल्होधिकारी अंकीत यादव हांणी दिली.
क्लब, रेस्टॉरंण्टांच्या फायर सेफ्टी तशेंच हेर सुरक्षा यंत्रणेची तपासणी जातली, अशें मुख्यमंत्र्यांनी जाहीर केल्लें. हे प्रमाण आतां नायट क्लब, रेस्टॉरंण्टां हांचे सुरक्षा वेवस्थेची आपत्ती वेवस्थापन कायद्या खाला तपासणी जातली.
गरजेचे परवाने/ एनओसी
1. फायर एनओसी सयत उजो पालोवपी दळाच्यो अटी पाळप, 2. ओकुपन्सीची तांक भायर नमूद करची. ओकुपन्सीचे तांकी परस चड लोकांक प्रवेश दिवचो न्हय.
3. स्मोक/ हीट डिटेक्टर्स, अलार्म्स, स्प्रींकलर्स, हायड्रंटस, फायर एक्स्टींग्युशर्सची वेवस्था आसची, 4. प्रमाणीत आशिल्ली इलेक्ट्रीकल वायरींग आनी उपकरणां गरजेचीं, 5. आप्तकालीन एक्झीट मार्ग तशेंच इवॅक्युएशन आराखडो आसचो.
6. कर्मचाऱ्यांक नेमीत प्रशिक्षण दिवप. दरेकी शिफ्टीक फायर सेफ्टी अधिकारी गरजेचो, 7. एनडीएमएच्या शिफारशी प्रमाण कर्मचाऱ्यांक प्रशिक्षण दिवप गरजेचें.
सगले परवाने तशेंच सुरक्षा ऑडीट अहवालाची आप्तकालीन वेवस्थापन कायदो 2005 च्या कलम 51 (ब) खाला तपासणी जातली. सुरक्षा ऑडीट अहवाल वा परवाने नासल्यार कायद्या प्रमाण कारवाय जातली, अशें अॅडवायजरींत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
