भांगरभूंय | प्रतिनिधी
पणजीः वर्ल्ड पीस युनिव्हर्सिटी 50 एकर सुवातेंत थिये हांगासर येतली. कोमुनिदाद आनी सरकाराच्या माध्यमांतल्यान थळाव्यांनी मोगान आमकां सुवात दिल्या. ऑगस्ट 2026 पसून अभ्यासक्रम सुरू जावन वर्सुकी फी सरासरी रु 7.50 लाख आसतली, अशें एमआयटी वर्ल्ड पीस युनिव्हर्सिटीचे (डब्लुपीयू) मुखेली डॉ. राहुल कराड हांणी सांगलें.
ह्या विद्यापिठा विशीं म्हायती दिवपा खातीर आपयिल्ले पत्रकार परिशदेंत कराड उलयताले. ह्या वेळार डब्लुपीयूचे प्रतिनिधी डॉ. शिव त्रिपाठी, डॉ. ह्रदयंश देशपांडे, डॉ. श्रुती निगूडकर, लक्ष्मण बदामी हजर आशिल्ले.
डब्लुपीयू विशीं अदीक म्हायती दितना कराड हांणी सांगलें, विद्यापिठ्याच्या कॅम्पस प्रकल्पाचें 5 टक्के काम सद्या पुराय जालां. स म्हयन्यां भितर विद्यापिठचो शिक्षणीक संकूल तयार जावन सुरवेक पांचशे भुरगे आमी भरती करतले. ऑगस्ट 2026त अभ्यासक्रमाची पयली बॅच सुरू जातली, आनी काय काळा उपरांत आमी ल्हवू ल्हवू विद्यार्थ्यांची संख्या वाडयतले.
5-6 वर्सां पयलीं गोंय सरकारान खाजगी शिक्षण धोरण उजावाडाक हाडून आमकां येवकार दिल्लो. जें राज्य सरकाराचें आरक्षण धोरण आसा ते आमी विद्यापीठ प्रवेशा खातीर आस्पावन घेतला. येता ते दोन-तीन म्हयन्या भितर प्रवेशा खातीर आमची वॅबसायट सुरू जातली, अशें कराड हांणी म्हणलें.
हे एक निवासी विद्यापीठ आसतलें. हातूंत देशांतले तशेंच गोंय राज्यातले विद्यार्थी लेगीत विद्यापिठाचे हॉस्टेलांत दवरून आमी विद्यार्थांक मानसीक आनी शारिरीक रितीन तयार करतले. ह्या विद्यापिठांत 10 अभ्यासक्रम शिकयतले. हॉस्टेल आनी अभ्यासक्रमा सयत वर्सुकी फी सरासरी साडे सात लाख रुपया आसतली. हे फी दोन देशांनी आनी देशांतल्या पांच शारांनी शैक्षणीक भोंवडेचो आस्पाव आसा. जाल्यार 5 टक्के मेरीट विद्यार्थ्यांक शिश्यवृत्ती येवजणे सयत फुकट प्रवेश आसा जाल्यार हेर गुणवंत विद्यार्थ्यांक 25 टक्के मेरेन आमी सूट दितात. तशेंच विद्यापिठांतच प्लॅसमेंट जातलें, अशें कराड हांणी म्हणलें.
गोंय हे पर्यटन आनी मनरिजवणे खातीर फामाद आसा. देखून शिक्षणीक क्षेत्र गोंयांत कशें चलतलें हें विशींचो दुबाव आमच्या पदाधिकाऱ्यां भितर आसलो. पूण गोंयांत इफ्फी, सेरेडेंपीटी सारक्यो सासणा खातीर कार्यावळी चलतात. हाच्या आदारार आमी गोंय शिक्षण खातीर नांवरुपाक येवचें हे खातीर हांवें म्हज्या वांगड्यांक समजायलें. आतां आमी डब्लुपीयू गोंयच्या जनेतेच्या आशिर्वादाचेर फुडें व्हरपाक सोदतात, अशें कराड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
