भांगरभूंय | प्रतिनिधी
नवी दिल्ली, खबरां संस्था : ऑगस्टांत पयशां संबंदी कांय सेवा आनी वस्तूंच्या दरांत बदल जावंक शकता. १ ऑगस्टा सावन एलपीजी सिलिंडराच्या दरांत आनी एचडीएफसी क्रेडीट कार्डाच्या नेमांत कांय बदल जावपाची शक्यताय आसा. देखून ताचो परिणाम तुमच्या बोल्साचेर पडूं येता. ३१ जुलय ही आयटीआर दाखल करपाची निमाणी तारीख. १ ऑगस्टा सावन आयटीआर दाखल करपाच्या नेमांत बदल जातलो. करदात्यांक आयटीआर दाखल करतना दंडाची रक्कम भरची पडटली. हो दंड ५ हजार रुपया इतलो आसतलो.
एलपीजी सिलिंडराचे दर बदलतले
दर म्हयन्याचे १ तारखेक एलपीजी गॅस सिलिंडराच्या दरांत बदल जाता. ताचो परिणाम गिरायकांच्या बोल्साचेर जाता. जुलयांत सरकारान १९ किलो वेपारी सिलिंडरांचें दर उणें करपाचो निर्णय घेतिल्लो. फाटल्या कांय म्हयन्यां सावन देशांतल्या गॅस सिलिंडरांच्या दरांत कसलोच बदल जावंक ना. ऑगस्ट म्हयन्यांत एलपीजी सिलिंडरांचें दर उणें जातलें असो अदमास आसा.
एचडीएफसी बँक क्रेडीट कार्डाचे नेम
एचडीएफसी बँकेन १ ऑगस्ट सावन जायते बदल केल्यात. ताचो परिणाम क्रेडीट कार्ड धारकांचेर जातलो. ऑगस्ट सावन Paytm, CRED, Mobi Kwik आनी Cheq ह्या ऍप्लिकेशनां वरवीं वेव्हार केल्यार फारीकणी रकमेचेर १% शुल्क लागतलें. ते खातीर ३००० रुपया वेव्हाराची मर्यादा आसा. १५ हजार रुपया सकयल दर इंधन वेव्हाराक शुल्क ना.
अतिरिक्त मुजतवाड रक्कमेचेर उशीराची फी वाडयल्या. आतां गिरायकांक १०० ते १३०० रुपया मदलो भार सोंसचो पडटलो. एचडीएफसी बँकेक १ ऑगस्टाक टाटा न्यू इन्फिनिटी आनी टाटा न्यू प्लस क्रेडीट कार्डां संबंदी कांय बदल दिसतले. वापरकर्त्यानी टाटा न्यू युपीआय आयडीचो वापर केल्यार युपीआय वेव्हाराचेर १.५% न्यूकॉयन मेळटले.
Google Maps नेमांत बदल
गूगल मॅपांनी भारतांतल्या नेमां संबंदी कांय बदल केल्यात. हे नेम १ ऑगस्ट सावन लागू जातले. भारतांतल्या तांच्या सेवे विशीं कंपनीन व्हडली घोशणा केल्या. कंपनीन सेवा शुल्क ७० टक्क्यां मेरेन उणें केलां. पूण ताचो परिणाम वापरप्यांक दिसचो ना. तंत्रगिन्यान कंपनी गूगलान सामान्य गिरायकां खातीर कसलेंच अतिरिक्त शुल्क घेवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
