भांगरभूंय | प्रतिनिधी
निर्यातींत 6.21 टक्के, आयातींत 12.3 टक्के वाड
नवी दिल्ली, खबरा संस्था ः भारतातली वेपारी म्हालाची निर्यात ह्या वर्सा ऑक्टोबरांत 6.21 टक्क्यांनी वाडून 33.57 अब्ज डॉलर जाली. तरी ह्या म्हयन्यांत आयात आनी निर्यात हांचे मदलो फरक आशिल्ली वेपारी तूट 31.46 अब्ज डॉलर विक्रमी उंचायेचेर पावल्या अशें बुधवारा सरकारी आंकडेवारीन जाहीर केलां. ह्या म्हयन्यांत भांगराची आयात वाडिल्ल्यान आयात मोल 12.3 टक्क्यांनी वाडून 65.03 अब्ज डॉलर जालें.
फाटल्या ऑक्टोबरांत भांगराची देशांतली मागणी वर्सुकी तुळेंत 95.5 टक्क्यांनी वाडून 7.23 अब्ज डॉलर जाली. आंतरराष्ट्रीय दर उश्ण जाल्ल्यान कच्च्या तेलाच्या आयात खर्चांतय ह्या म्हयन्यांत 8 टक्क्यांनी वाड जावन 17.66 अब्ज डॉलर पावला आनी ताका लागून वट्ट आयात मोलांत 12.3 टक्क्यांनी वाड जाल्या.
फाटल्या वर्सा ऑक्टोबरांत देशांतली वस्त वेपाराची तूट 26.31 अब्ज डॉलर आशिल्ली. वाणिज्य मंत्रालयाचे अतिरिक्त सचीव एल. सत्य श्रीनिवास हांणे पत्रकारांक म्हायती दितना सांगलें ऑक्टोबरांतली वेपारी तूट (आयात आनी निर्यात हांचे मदलो फरक) ही आतां मेरेनची ‘सगल्यांत चड’ आसा.
चालू वित्तीय वर्सा एप्रिल ते ऑक्टोबर ह्या सात म्हयन्यांत निर्यात सात टक्क्यांनी देंवून 244.89 अब्ज डॉलर जाल्या, जाल्यार आयातय 8.95 टक्क्यांनी देंवून 391.96 अब्ज डॉलर जाल्या. सात म्हयन्यांच्या काळांत वेपारी तूट 147.07 अब्ज डॉलर आशिल्ली, जाल्यार फाटल्या वर्साच्या ह्याच काळांत 167.14 अब्ज डॉलर आशिल्ली. 2023-24 वित्तीय वर्सात भारताची वट्ट वस्तू आनी सेवा निर्यात आतां मेरेन 437.54 अब्ज डॉलर जाली असो अदमास आसा जी फाटल्या वर्साच्या ह्याच काळाच्या तुळेंत 1.61 टक्क्यांनी देंवल्यां.
निर्यात- आयातीचे घटक खंयचे?
एप्रिल- ऑक्टोबर अर्थीक वर्सा भांगराची आयात 23 टक्क्यांनी वाडून 29.5 अब्ज डॉलर जाली, जाल्यार खनिज तेलाची आयात 18.72 टक्क्यांनी उणी जावन सुमार 100 अब्ज डॉलर जाल्या. ऑक्टोबर 2023 वर्सा निर्यात वाडपाक मुखेल योगदान दिवपी अभियांत्रिकी वस्त, वखदां, इलॅक्ट्रॉनिक्स आनी शेतकी म्हाल, कापूस सुत, हातमाग उत्पादनां, लोखण, मातयेचीं उत्पादनां आनी कंवचेचीं वस्त, मांस, दुदाचे आनी पोल्ट्री उत्पादनां हांचो आस्पाव जाता. दुसरे वटेन ऑक्टोबरांत चड वाड जाल्ल्या आयात घटकांत दाळ (112.2 टक्के), फळां आनी भाजीपालो (53.4 टक्के), अलोह धातू (21.24 टक्के) आनी इलॅक्ट्रॉनिक्स वस्तू (26 टक्के) हांचो आस्पाव जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
