भांगरभूंय | प्रतिनिधी
पणजी: गोंय पुलिसांच्या गुन्यांव फांट्यान एस्कॉर्ट वेबसायटीवेल्यान शिंदळकी धंदो चलोवपी टोळयेचो चवथो वांगडी सुभाष प्रधानाक (३२, ओडिशा) अटक केली. ह्यान पयलीं हैदराबाद सावन दोग आनी गाजियाबादच्यान एकल्याक अटक केल्ली.
अटक केल्लो सुभाष प्रधान हो मुळचो ओडिशाचो. सध्या तो कांदोळेच्या एका हॉटेलांत काम करता. सुभाष हो वेबसायटी वरवीं शिंदळकी धंदो चलयतालो. वेबसायटीचेर दिल्ल्या नंबराच्या आदाराचेर लोक ताचे कडेन संपर्क करताले. पयशांचो वेव्हार जाले उपरांत दलालांचे मजतीन तो चलयांची पुरवण करतालो. ह्या कामाचे तो ऑनलाय पेमेंट ऍप्लिकेशना वरवीं तशेंच रोख पयशे घेतालो.
मजगतीं, गोंय पुलिसांच्या गुन्यांव फांट्यान हे विशीं चवकशी करून सुभाषाक अटक केली. ताचेर म्हायती आनी तंत्रज्ञान कायदो कलम ६७,६७ अ, बायलां अश्लील प्रतिनिधीत्व कायदो कलम ६ आनी शिंदळकी वेवसाय प्रतिबंधक कायदो कलम ४ आनी ५ अन्वये गुन्यांव नोंद केल्यात. असल्या गुन्यांवांनी गुंथिल्ल्या जायत्या जाणांचेर पुलीस नदर दवरून आसात. हे विशीं अधीक्षक (गुन्हे) राहुल गुप्ता आनी उपअधीक्षक राजेश कुमार हांच्या मार्गदर्शना खाला पुलीस निरीक्षक तुषार लोटलीकार तशेंच पुलीस निरीक्षक दत्ताराम राऊत फुडलो तपास करतात.
मजगतीं, एस्कॉर्ट वेबसायट तयार केले उपरांत शिंदळकी धंदो करून गोंयची बदनामी करपी दोगांक गोंय सायबर विभाग तशेंच गुन्यांव फांट्यान आंध्रप्रदेशांत वचून अटक केल्ली. हेच फाटभूंयेर गोंय पुलीस सेगीत हे विशीं तपास करताले. मजगतीं उत्तर प्रदेशांतल्या गाजियाबाद मेरेन ह्या प्रकरण पातळिल्ल्याचें समजतांच गुन्यांव फांट्यान कारवाय करून गोंयांत शिंदळकी धंदो चलोवपी योगेश कुमार (४१) ह्या तिसर्या दुबाविताक अटक केल्ली. चवथो दुबावीत फरारी आशिल्लो. ताका पुलिसांनी अटक केल्या.
सध्या सय्यद सुलतान उस्मान (५४, रा. चित्तोर आंध्रप्रदेश), मोहम्मद सलामतुल्लाह मोहेबुल्ला (३०, रा. गुरगाव हरियाणा), योगेश कुमार (४१) आनी सुभाष प्रधान (३२, ओडिशा) हांकां धरल्यात. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
