भांगरभूंय | प्रतिनिधी
दोग बायलो आनी एका दलालाक अटक
भांगरभूंय । प्रतिनिधी
म्हापशें: एस्कॉर्ट चलयो दिवपाच्या नांवा खाला पर्यटकांची लुटमार आनी खंडणीचें आंतरराज्य रॅकेट पर्वरी पुलिसांनी उडवाडाक हाडलें. बबिता रमेश उपाध्यय (28. रा. मुंबय), सुतापा बॅनर्जी (38. रा. पश्चीम बंगाल) ह्या दोग बायलां सयत मोटारचालक दीपक साळगांवकार (37. रा. कांदोळी) ह्या तिगांक पर्वरी पुलिसांनी अटक केली.
ही घडणूक शुक्रारा 30 ऑगस्टाक दनपारां 3.20 वरांच्या सुमाराक पर्वरीच्या क्लासीक हॉटेलांत घडिल्ली. फिर्यादी सागर अन्सारी आनी ताचो इश्ट शोयब अहमद सादीक हो दोग पंजाबांतले तरणाटे गोंयांत पर्यटना खातीर आयिल्ले.
ताच्या एस्कॉर्ट संकेतथळाचेर दुबावीत बायलांचो संपर्क जालो. ते प्रमाण त्या दुबावीत मोटारचालक दलाला वांगडा हॉटेलाचेर आयल्यो. सोरो पियेत संगिताच्या तालाचेर नाच करून त्यो फिर्यादींक खोसी करपाचो बेत तांचो थारिल्लो.
दुबावीत बायलांनी हॉटेलाचे कुडींत वतकच त्या दोगूय पर्यटकांक मारपेट केलो. तशेंच पयशे दिले ना जाल्यार कपडें पिंदून भायर धांवतलीं आनी आरड मारून लोकांक आपयतलीं. तेचवरी पुलिशेंत बलात्कार केल्ल्याची कागाळ करतलीं, अशी धमकी दुबावीत बायलांनी दिली. ताका लागून त्या बायलांनी भियेवन दुसरो उपाय नाशिल्ल्यान दुबावीत बायलांच्या खात्यांत गुगल पे वरवीं 2- हजार रुपया जमा केले. ते पयशे खात्यांत जमा जाले उपरांत दुबावीत बायलो घडणुकेचे सुवाते वयल्यान पळून गेल्यो.
ते उपरांत सांजे वेळार त्या पर्यटकांनी पर्वरी पुलिशेंत वचून रितसर कागाळ दाखल केली. पुलिसांनी ह्या प्रकरणांत ताकतिकेन कारवाय केली आनी तांत्रीक तशेंच मानवी बुद्दीमत्तेच्या आदारान दुबावितांक हणजूण्यां धरून अटक केली. तशेंच दुबावितां कडली जीए 04 ई 9710 नेबराची बोलेनो मोटार जप्त केली आनी गुन्यांव नोंद केलो.
पुलीस निरिक्षक राहूल परब हांच्या मार्गदर्शनाखाला उपनिरिक्षक मंदार परब, अरूण शिरोडकार, कॉन्सटेबल महादेव नायक, नितेश गावडे आनी सुनिता राठोड ह्या पंगडान ही कामगिरी केली. दुबावीत बायलो कांदोळे भाड्याचे कुडींत रावताल्यो. हो प्रकार घडले उपरांत मुंबय पळून वचपा खातीर त्यो भायर सरल्यो. त्या दुबावीत दलालान तांकां मोटारीन कांदोळेच्यान हणजूणें मार्गान मुंबय सोडपाक विचार केलो. ही म्हायती मेळटाच पुलिशेन हणजूण्यां वचीन दुबावितांक धरले.
दुबावीत धमकी दिवन पयशे काडटाले
दुबावीत हे आंतरराज्य लुटमार आनी खंडणीचें रॅकेट चलयताले. एस्कॉर्ट चलयो दिवपाच्या नांवान दुबावीत बायलो हॉटेलांत दादल्या पर्यटकां वांगडा वतात. हॉटेलाचे कुडींत गेले उपरांत बलात्काराचो फटीचो गुन्यांव दाखल करपाची धमकी दिवन वा मारपेट करून पर्यटकां कडल्यान पयशें काडटाले. ह्या रॅकेंटांत आस्पाव आशिल्ल्या हेर दुबावितांची पुलिसांनी वळख पटयल्या आनी तांकां सोदपाचो वावर हातांत घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
