भांगरभूंय | प्रतिनिधी
बिगर गोंयकार बायलेक अटक, सुटका; शिवोलींतली घडणूक
भांगरभूंय । प्रतिनिधी
म्हापशें: फेसबुकाच्या माध्यमांतल्यान एस्कॉर्ट सेवा दिवपाच्या नांवा खाला हैदराबाद तेलंगणांतल्या पर्यटकांची लुबाडणूक केल्ल्या प्रकरणांत म्हापशें पुलिसांनी रोशनी कवास (27, बेती बार्देस, मूळ नेपाळी) हिका अटक केली. उपरांत म्हापशें न्यायालयान दुबावीत बायलेक सशर्त जामिनाचेर सुटका केली.
हो प्रकार 15 डिसेंबराक जालो. रातच्या 10 वरांच्या सुमाराक सडयें शिवोलेच्या रामसन्स लक्सो नांवाच्या गेस्ट हांवसा लागसार घडिल्लो. ह्या प्रकरणांत टी. कुणाल सिंग (रा. हैदराबाद तेलंगणा) हांणी 19 डिसेंबराक पुलिशेंक कागाळ दाखल केल्ली.
फिर्यादी आनी ताच्या इश्टांनी फेसबुकाचेर आशिल्ल्या एका एस्कॉर्ट सेवा दिवपी संकेतथळाचेर दुबावीत बायले कडेन संपर्क केलो. ते प्रमाण ही सेवा दिता अशें सांगून दुबावीत बायल घडणुकेच्या थळाचेर आयली आनी फिर्यादी तशेंच तांच्या इश्टांची बदनामी करची न्हय अशी धमकी दिली. तशेंच मोबायल आनी 20 हजार रुपया रोख झोमून व्हेल्ले. ह्या प्रकरणांत पुलिसांनी गुन्यांव दाखल करून दुबावीत बायलेक बुधवारा अटक केली.
ते उपरांत म्हापशेंच्या प्रथमवर्ग न्यायालयान दुबावीत बायलेची 10 हजार रुपयांची वैयक्तीक हमी आनी तितलेच रकमेच्या हमीदारा प्रमाण सुटका केली. 15 दीस दर दिसा सकाळीं पुलीस स्टेशनाचेर हाजेरी लावप, अशे तरेचो गुन्यांव परतून करचो न्हय, न्यायालयाचे परवानगे बगर गोंय तशेंच देशा भायर वच्चें न्हय, ह्या प्रकरणा कडेन संबंदीत मनशांक हांयस दाखोवपाचो वा पुरावे नश्ट करपाचो यत्न करचो न्हय आनी हेर अटी न्यायालयान जामिनाचेर सुटका करतना घातल्यात. मजगतीं, अशेच तरेन आंध्रप्रदेशांतल्या एका पर्यटकाची लुबाडणूक केल्ल्या प्रकरणांत पणजी पुलिसांनी दुबावीत बायलेक 16 डिसेंबराक ताब्यांत घेवन अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
