भांगरभूंय | प्रतिनिधी
खंय गुंतवणूक करप फायद्याचें थारतलें?
युनियन बँक, बँक ऑफ इंडिया (बीओआय) आनी स्टेट बँक ऑफ इंडिया (एसबीआय) हांणी हालीं मुजत ठेवींचेर व्याजदरांत बदल केला. अशे स्थितींत, जर तुमी ह्या बँकांनी वा हेर खंयचेय बँकेंत एफडी करपाचो विचार करता जाल्यार ताचे पयलीं तुमकां ‘बायलां सन्मान बचत प्रमाणपत्र’ (MSSC) हे विशीं म्हायती आसप गरजेचें.
ही बायलां खातीर एक खाशेली येवजण. हातूंत ७.५ टक्के वर्सुकी व्याज दितात. उण्यांत उणें १००० ते चडांत चड २ लाख रुपया गुंतवणूक करूं येतात. २ वर्सां गुंतवणूक करची पडटा.
२ वर्सां पयलीं पयशे काडपाक मेळटले
खाशेले परिस्थितींत हें खातें २ वर्सां आदीं बंद करूं येता, मात ६ म्हयन्यां उपरांतच. पूण, अशें केल्यार ७.५% व्याज बदला फकत ५.५% व्याज मेळटलें. हें व्याज मुळाव्या रकमेचेर दितले. ते भायर १ वर्सा उपरांत ४०% रक्कम काडूं येता.
चलयेच्या नांवांतूय गुंतवणूक करूं येता
हे येवजणे खाला बायलांक स्वता खातीर खातें उगडपाक मेळटा. ते भायर पालक आपले धुवेच्या (अल्पवयीन) नांवान ‘महिला सन्मान बचत प्रमाणपत्र’ हातूंत गुंतवणूक करूंक शकतात. म्हणल्यार नेण्टे चलयेच्या नांवानूय गुंतवणूक करूं येता.
हातूंत खातें खंय आनी कशें उगडप?
तुमी खंयच्याय टपाल खात्यांत आनी अधिकृत बँकांनी एमएसएससी खातें उगडूंक शकतात. खातें उगडपा खातीर ताच्या फॉर्मा वांगडा केवायसी दस्तावेज सादर करचे पडटले.
गुंतवणूक करपाक योग्य सुवात खंय आसा?
एमएसएससी येवजणेंत वर्सुकी ७.५ टक्के व्याज दिवपाचें काम सुरू आसा जें स्थिर ठेवी परस चड आसा. एसबीआय आनी एचडीएफसी सध्या २ वर्सांच्या एफडीचेर ७% व्याज दितात. जाल्यार युनियन बँक ६.५०% आनी बीओआय ६.८०% वर्सुकी व्याज दिता.
व्याजदरांत व्हडलोसो फरक ना. तर, तुमच्या गरजे प्रमाण महिला सम्मान बचत प्रमाणपत्र आनी स्थिर ठेव हांचे मदीं निवड करूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
