भांगरभूंय | प्रतिनिधी
नवी दिल्ली, खबरां संस्था ः प्रधानमंत्री सुरक्षा पंगड म्हळ्यार स्पेशल प्रोटेक्शन ग्रुपाचे (एसपीजी) संचालक अरुणकुमार सिन्हा (61) हांकां बुधवारा गुडगांवच्या हॉस्पिटलांत मरण आयलें.
मार्च 2016 सावन राष्ट्रपती, प्रधानमंत्री आनी हेर फुडाऱ्यांचे सुरक्षेची जापसालदारकी घेवपी एसपीजीचे ते मुखेली आशिल्ले. 1987 वर्सा ते प्रधानमंत्री सुरक्षा फांट्याचे प्रभारी केरळ कॅडर आयपीएस अधिकारी आशिल्ले.
१९८७ वर्सा सेंट कोलंबस कॉलेज हजारीबागांतल्यान पुलीस सेवेंत बीएससी प्राणीशास्त्रांत वेंचून आयले. तांकां केरळ कॅडर दिलें. सुरवेक केरळांतल्या दोन तीन जिल्ह्यांचे पुलीस अधीक्षक आनी त्रिवेंद्रमचे पुलीस आयुक्त म्हूण तांणी काम केलां. उपरांत डीआयजी-आयजी म्हणूनय काम केलें.
2009 ते 2014 मेरेन तांणी गुजरात फ्रंटियरांत बीएसएफांत आय जी म्हणून नोकरी केली, उपरांत केरळांत परतून येवन 2016 मेरेन एडीजी म्हणून काम केलें. प्रधानमंत्री आनी राष्ट्रपती हांकां ई-मेल वरवीं मारपाच्यो धमक्यो आनी बॉम्ब प्रकरणां अशीं म्हत्वाचीं प्रकरणां सोडोवपाक तांणी व्हड योगदान दिले. तशेंच सिन्हाक विशिश्ट सेवे खातीर राष्ट्रपती पदक मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
