भांगरभूंय | प्रतिनिधी
मुख्यमंत्र्यान उक्तायलें समाधान
एसटी विधेयकाक राज्यसभेची मान्यताय
फुडले वेंचणुके उपरांत आरक्षण
भांगरभूंय । प्रतिनिधी
पणजी : लोकसभे उपरांत गोंय एसटी प्रतिनिधीत्व विधेयक राज्यसभेंत संमत जाल्ल्यान आदिवासी समाजाचें सपन पुराय जालां. प्रधानमंत्री नरेंद्र मोदी आनी केंद्र सरकाराचे हांव उपकार मानतां. सबका साथ, सबका विकास, सबका विश्वास आनी सबका प्रयास या तत्वाचेर भाजप सरकार वावर करता. एसटी प्रतिनिधीत्व विधेयकाक लागून लोकशाय घटमूट जावपा सयत अनुसूचीत जमातीक लेगीत न्याय मेळ्ळा, अशें मुख्यमंत्री डॉ. प्रमोद सावंत हांणी म्हणलां.
गोंय विधानसभेंत अनुसूचीत जमातींक आरक्षणाची तजवीज आशिल्लें गोंय विधानसभा अनुसूचीत जमाती प्रतिनिधीत्व विधेयक 2024 सोमारा राज्यसभेंत संमत जालें. लोकसभे उपरांत विधेयक राज्यसभेंत संमत जाल्ल्यान आतां फकत राष्ट्रपतींचे सयेची गरज आसा. राष्ट्रपतींची सय जाले उपरांत गोंय विधानसभा अनुसूचीत जमाती प्रतिनिधीत्व कायदो अस्तित्वांत येतलो.
बिहारांतल्या मतदार वळेरी उजळणी विशीं चर्चेची मागणी करतना विरोधी खासदारांनी सभात्याग केल्लो, त्या वेळार राज्यसभेंत आवाजी मतदानान विधेयक संमत जालें. फाटल्या सप्तकांत लोकसभेंत लेगीत विरोधकांच्या गोंदळांत हें विधेयक संमत जाल्लें. हाका लागून दोनूय सभाघरांनी चर्चा जाय नासतना हें विधेयक संमत जालां.
गोंय विधानसभेंत अनुसूचीत जातींक (एससी) आरक्षण आसलें तरीय अनुसूचीत जमातींक (एसटी) आरक्षण ना. अनुसूचीत जमातींची लोकसंख्या उणीं आशिल्ल्यान आरक्षणाची तजवीज नाशिल्ली. 2001 पयली अनुसूचीत जमातीची लोकसंख्या फक्त 566 आशिल्ली. हाचे उपरांत कुणबी, गावडा आनी वेळीप समाजाक अनुसूचीत जमातीचो दर्जो मेळ्ळो. हाका लागून 2011चे जनगणनेंत एसटीचो आंकडो देड लाखाचेर पावलो. लोकसंख्या वाडले उपरांत लेगीत एसटी समाजाक विधानसभेंत प्रतिनिधीत्व मेळ्ळें ना. हो घटनेच्या 332 परिशिश्टा प्रमाण अन्याय थारता.
आतां जनगणना कायद्या खाला केंद्र सरकाराक जनगणना आयुक्तांची नेमणूक करची पडटली. जनगणना आयुक्त राज्यांतल्या एसटी समाजांतल्या लोकांची जनगणना करून लोकसंख्या निश्चीत करतलो. एसटी जनगणने प्रमाण वेंचणूक आयोग मतदारसंघ फेररचणुकेचो आदेश जारी करतलो. जनतेच्यो हरकती आनी सुचोवण्यो घेवन मतदारसंघ फेररचणुकेचो आदेश जारी जातलो. हे प्रमाण एसटी खातीर मतदारसंघ राखीव जातले. ही विधानसभा विसर्जीत जाले उपरांत फुडले वेंचणूके सावन आरक्षण लागू जातलें, अशी तजवीज विधेयकांत आसा.
आस्वासनाची पुर्तताय : दामू नायक
एसटी समाजाक विधानसभेंत आरक्षण दिवपाचें आस्वासन भारतीय जनता पक्षान दिल्लें. आतां विधेयक दोनूय सभाघरांत संमत जाल्ल्यान आस्वासनाची पुर्तताय जाल्या. विधेयका वेळार काँग्रेसीन सभात्याग केलो. काँग्रेस एसटी समाजा वांगडा ना, हें हे गजालींतल्यान सिद्ध जालां. भारतीय जनता पक्ष सेगीत अनुसूचीत जमातीचे उदरगती खातीर वावुरला, अशें भाजप प्रदेशाध्यक्ष दामू नायक हांणी सांगलें.
काँग्रेस फक्त राजकारण करता : सदानंद शेट तानावडे
एसटी प्रतिनिधीत्व विधेयक लोकसभे उपरांत राज्यसभेंत संमत जालें. प्रधानमंत्री नरेंद्र मोदी तशेंच पक्षाचे राष्ट्रीय अध्यक्ष जे. पी. नड्डा हांचें हांव उपकार मानतां. एसटी आरक्षणाचेर काँग्रेसीन आयज मेरेन फक्त राजकारण केलां. राज्यसभेंत विधेयक आयलें तेन्ना तांणी सभात्याग केलो. हाचे वयल्यान काँग्रेसीची निती स्पश्ट जाता, अशें राज्यसभा खासदार सदानंद शेट तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
