एसटी विद्यार्थिनीचे शिश्यवृत्ती रकमेंत वाड

भांगरभूंय | प्रतिनिधी

पणजी: आदिवासी कल्याण खात्या वतीन एसटी समाजांतल्या बारावी पास विद्यार्थिनीक दितात ते शिश्यवृत्ती येवजणे खातीर तांच्या कुटुंबाची वर्सुकी उत्पन्न मर्यादा वाडयल्या. हाचे पयलीं येवजणेचो लाव घेवपा खातीर एसटी समाजांतल्या विद्यार्थिनीच्या पुराय कुटुंबाची वर्सुकी उत्पन्न मर्यादा तीन लाख रुपया आशिल्ली. आतां ती वाडोवन वर्सुकी पांच लाख रुपया केल्या. तशेंच येवजणे खाला मेळपी शिश्यवृत्तीची रक्कम पांच हजार रुपयांनी वाडोवन 30 हजार रुपया केल्या.

येवजणे खातीर 2023-24 वर्सा वा ताचे पयलीं धावी पास जाल्ल्या एसटी समाजांतली विद्यार्थिनी अर्ज करूंक शकता. विद्यार्थिनी बारावी तीन परस उण्या यत्नांत पास जाल्ली आसूंक जाय. नाजाल्यार दोन वर्सांचो आयटीआय अभ्यासक्रम पुराय करप गरजेचें आसा. अर्जांची छाननी करून पात्र विद्यार्थिनीच्या बँक खात्यांत थेट 30 हजार रुपया जमा करतले. इत्सुकांनी ऑनलायन पद्दतीन अर्ज भरप गरजेचें आसा. ताचे सयत जात प्रमाणपत्र, धावी आनी बरावीचे गुणपत्रक, आधार कार्ड आनी उत्पन्न प्रमाणपत्र जोडप गरजेचें आसा. पास जाल्ल्या विद्यार्थ्यांक स म्हयन्यां भितर अर्ज करप गरजेचें आसा.

हे येवजणे खातीर खात्यान पांच वांगड्यांची समिती स्थापन केल्या. खात्याचे संचालक वांगडी सचीव उत्तर सचीव अध्यक्ष म्हूण काम पळयतले. ही येवजण फुडल्या पांच वर्सां खातीर सुरू उरतली. ही येवजण एसटी समाजांतल्या विद्यार्थिनींक शिक्षणा खातीर प्रोत्साहन दिवप, तांकां अर्थीक मजत दिवप हे खातीर सुरू केल्ली. मेळिल्ले म्हायती प्रमाण फाटल्या पांच अर्थीक वर्सांत गोंयच्या 3856 विद्यार्थिनींनी हे येवजणेचो फायदो घेतला. ह्या वेळार सरकारान हे येवजणेचेर सुमार 10 कोटी रुपया खर्च केल्यात.