भांगरभूंय | प्रतिनिधी
पणजी : आपरोजगार येवजणे खाला एसटी भावांक रिण दिवपी येवजणेच्या रिणाचे पयशे १३ जाणांक फारीक करपाक अपेस आयलां. १३ लावार्थ्यां कडल्यान ५० लाख १५ हजार रूपयांची थकबाकी आसा. एकल्याची १० लाखां वयर थकबाकी आसा.
आमदार एल्टन डिकोस्टा हांच्या प्रस्नाक आदिवासी कल्याण खात्याचे मंत्री ह्या नात्यान मुख्यमंत्री डॉ. प्रमोद सावंत हांणी ही लेखी जाप दिल्या. गोंय राज्य अनुसूचीत जमात अर्थीक म्हामंडळावेल्या आपरोजगारा खातीर रिण दिवपी येवजणेची कार्यवाय जाता. हे येवजणे खातीर वेगळ्या निधीची तजवीज करूंक ना. सरकाराच्या स्वयंरोजगार येवजणे खातीर जो निधी आसा, तेच निधीचो वापर जाता, अशें डॉ. सावंत हांणी सांगलें. तशेंच रिणाची वसुली जावन जो निधी येता, तातुंतल्यान नव्या लावार्थ्यांक रिण दितात.
२०१९- २०२० ते २०२४ – २०२५ मेरेन ६ वर्सांत ४९ जाणांनी हे येवजणेचो लाव घेतला. १ लाख ते १३ लाख रूपयां मेरेन रिण दिलां. फाटल्या ६ वर्सांत ४९ जाणांनी येवजणेचो लाव घेतला. हाचे मदल्या १३ जाणांनी ५० लाख १५ हजार ५८० रूपयांची थकबाकी आसा. ह्या १३ लावार्थ्यांक वट्ट १ कोटी ३ लाखांचें रिण मंजूर जालां. हाचे मदल्या ५० लाख १५ हजार ५८० रूपयांची थकबाकी आसा.
ओटीएस येवजण ना
रिणाची थकबाकी वसूल करपा खातीर म्हामंडळान एकरकमी रिण फारीक (ओटीएस) येवजण सुरू करूंक ना. हे येवजणेखाला रिण वसूल करपाक हाचे पयली केन्ना ओटीएस येवजण नासली, अशेंय डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
