एसटी, एससी उपयेवजणे खाला सोसायटींच्या दूद सहकारी संस्थांक अर्थीक मजत

भांगरभूंय | प्रतिनिधी

पणजीः एसटी आनी एससी उपयेवजणे खाला (उपयेवजण) हे सोसायटीच्या दूद सहकारी संस्थांक 50 हजार ते 3.75 लाख रुपया मेरेन अर्थीक मजत दितले. जाल्यार हेर दूद संस्थांक 30 हजार ते 1.50 लाख रुपया मेरेन मजत दितले. हे विशीं सहकारी खात्यान हालीं अधिसुचोवणी जारी केल्या. ह्या संस्थांक तांणी केल्ल्या दूदाच्या संग्रहा प्रमाण मजत जातली.

अधिसुचोवणे प्रमाण ज्या सहकारी संस्थांनी उण्यांत उणे 15 टक्के भागीदार अनुसूचीत वा अनुसूचीत जाती समाजांतले आसात तांकां हो फायदो मेळूं येता. दिसाक 25 ते 75 लिटर दूद एकठांय करपी संस्थांक 50 हजार रुपया, 75 ते 300 लिटर दूद एकठांय करपी संस्थांक 1 लाख, 300 ते 500 लिटर दूद एकठांय करपी संस्थांक 1.25 लाख, 500 ते 750 लिटर दूद एकठांय करपी संस्थांक 1.75 रुपया. एक लाख रुपया दितले.

तशेंच 750 ते 1000 लिटर दूद एकठांय करपी संस्थांक 2.25 लाख, 1 ते 1250 लिटर दूद एकठांय करपी संस्थांक 3 लाख आनी एसटी, 1250 लिटर परस चड दूद एकठांय करपी एसटी, एससी संस्थांक 3.75 लाख रुपया मेळटले. ह्या संघटनांक तांच्या एसटी, एससी शेअरधारकांची वळेरी सहकारी खात्याक दिवची पडटा. भागिदारांची टक्केवारी पुश्टी केले उपरांत तांकां ही येवजण मेळटली.

हाचे भायर हेर सहकारी दूद संघटणांकय अर्थीक मजत दितले. दिसाक 50 ते 150 लिटर दूद एकठांय करपी संस्थांक 30 हजार रुपया, दिसाक 150 ते 300 लिटर दूद एकठांय करपी संस्थांक 75 हजार रुपया, दिसाक 300 ते 500 लिटर दूद एकठांय करपी संस्थांक 1 लाख आनी चड एकठांय करपी संस्थांक 1.50 रुपया दिसाक 500 लिटर दूदा परस चड पयशे दिवपाची म्हायती अधिसुचोवणेंत नमू दकेल्या.

राज्यांत दुदाचें उत्पादन उणें आसा. दुदाची गरज पुराय करपा खातीर हेर राज्यांचेर आदारून रावचें पडटा. हे बाबतींत गोंय स्वावलंबीत करपा खातीर दूद सहकारी संस्थांक मजत करप गरजेचें आसा. हे खातीर ही येवजण तयार केल्या. ते प्रमाण दूद संस्थां खातीर तांची उदरगत करपा खातीर ही येवजण सुरू केल्या. सध्या हे येवजणे भायर सहकारी खात्याच्यो हेर वेगवेगळ्यो येवजण्योय चलतात अशें अधिसुचोवणेंत नमूद केला.