भांगरभूंय | प्रतिनिधी
एसआयपी (SIP) वरवीं भारतांत गुंतवणूक नेटान वाडल्या. एएमएफआयच्या आंकडेवारी प्रमाण, सात वर्सां आदीं एसआयपी वरवीं म्हयनाळें योगदान ३ हजार कोटी रुपया आशिल्लें. आतां तें वाडून म्हयन्याक १६ हजार रुपया जालां. एसआयपी लोकांक तांची गुंतवणूक योग्य रितीन नियोजन करपाक मदत करता. ताचे जायते फायदे आसले तरी तातूंत कांय लुकसाणूय आसा. ह्या कारणा खातीर सगळ्यांनी एसआयपी करचे पयलीं कांय गजाली लक्षांत दवरच्यो.
पयलीं तुमचीं अर्थीक ध्येयां थारावचीं. फकत एसआयपी न्हय तर खंयच्याय प्रकारच्या गुंतवणुकीचें हें पयलें पावल. तुमचो उद्देश दीर्घकाळ वा अल्पकाळ आसा हें थारावप गुंतवणूक वाहन निवडप सोंपें जातलें.
एसआयपी करचे पयलीं तुमी तुमचे जोखीम घेवपाचे तांकीचें मुल्यांकन करचें. जायत्या एसआयपींत तुमकां चड परतावो मेळूं येता, पूण थंय लेगीत जोखीम चड आसता. तशेंच उण्या धोक्याच्या येवजण्यांनीय परतावो उणो आसता.
एसआयपी पोर्टफोलियोंत विविधताय हाडपाक जाय. विविधताय आशिल्लें पोर्टफोलियो जोखीम आनी परताव्याचें समतोल दवरपाक मदत करतलें.
खंयच्याय एसआयपींत गुंतवणूक करचे पयलीं ताचे विशीं चड म्हायती मेळोवची. म्हायती मेळोवप जितलें म्हत्वाचें तितलेंच फंड हावज तपासप लेगीत म्हत्वाचें.
गुंतवणूक प्रवासांतली सगळ्यांत म्हत्वाची गजाल म्हळ्यार शिस्तबध्दताय. जेन्ना तुमी पुराय शिस्तबद्धपणान नेमान गुंतवणूक करतात तेन्नाच एसआयपी प्रभावी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
