‘एसआयआर’ मोहिमेक नेट

भांगरभूंय | प्रतिनिधी

55 टक्के अर्ज सादर : 15 दीस उरल्यात

भांगरभूंय । प्रतिनिधी

पणजी : मतदार पडटाळणी (एसआयआर) मोहिमेचे अर्ज घेवपाची मुजत सोंपपाक फक्त 15 दीस उरिल्ल्यान मोहिमेक नेट आयला. बिरेस्तार मेरेन बीएलओ कडल्यान पुराय गोंयांत 6,40,851 अर्ज घेवन तांचे डिजीटायजेशन जालां. मतदार पडटाळणीचे 55 टक्के अर्ज पावल्यात, अशी म्हायती जिल्होधिकाऱ्यां कडल्यान मेळ्ळी. गोंयांत 11,85,034 मतदारां मेरेन अर्जांचें वांटप जालां.

मतदार पडटाळणीचे अर्ज दिवपाची मोहीम 4 नोव्हेंबराक सुरू जाल्ली. मतदारांक म्हायती भरून 4 डिसेंबर मेरेन अर्ज सादर करप गरजेचें आसा. खंयच्यान कितले अर्ज आयले ताचो दर दिसा जिल्होधिकारी नियाळ घेतात, अशी म्हायती उत्तर गोंयचे जिल्होधिकारी अंकीत यादव हांणी दिली. उत्तर गोंयांत 2,97,333 अर्ज सादर जाल्यात.

बिरेस्तार मेरेन दक्षीण गोंयांत 3,43,518 अर्ज सादर जाल्यात, अशी माहिती जिल्होधिकारी एग्ना क्लेटस हांणी दिली. बीएलओ कडल्यान अर्ज सादर जावपाचें प्रमाण समाधानकारक आसा.

केंद्रीय वेंचणूक आयोगान 27 ऑक्टोबराक गोंया सयत 12 राज्यांनी मतदार पडटाळणी मोहिमेची घोशणा केली. मतदार पडताळणेची कार्यावळ लेगीत वेंचणूक आयोगान जारी केली. 28 ऑक्टोबर ते 3 नोव्हेंबर मेरेन मतदार अर्जांची छपाय जाली. 4 नोव्हेंबर सावन अर्ज वांटपाक सुरवात जाली. बीएलओंनी घराघरांत वचून मतदारा मेरेन अर्ज पावयले. नोंद आशिल्ल्या 100 टक्के मतदारा मेरेन अर्ज पावल्यात, असो दावो राज्याचे मुखेल वेंचणूक अधिकारी संजय गोयल हांणी केलो. गोंयांत 9 नोव्हेंबर मेरेन सगल्या मतदारां मेरेन अर्जांचें वांटप जालें. हाचे उपरांत 10 नोव्हेंबर सावन अर्ज घेवपाक सुरवात जाली. भरिल्लो अर्ज घेवपा खातीर बीएलओक उण्यांत उणें तीन खेपो घराक भेट दिवप सक्तीचें आसा. 9 डिसेंबर 2025 ह्या दिसा मतदार वळेरीचो मसुदो उजवाडायतले. हाचे उपरांत 9 डिसेंबर 2025 ते 31 जानेवारी 2026 मेरेन हरकतींचेर सुनावणी जातली. 7 फेब्रुवारी 2026 ह्या दिसा निमणी मतदार वळेरी प्रसिद जातली.