भांगरभूंय | प्रतिनिधी
सीटीझन फॉर डेमोक्रॅसीची प्रस्न: एसईसीक सादर केलें निवेदन
पणजी : मतदार पडताळणी मोहीमे (एसआयआर) खाला निमाणी मतदार वळेरी २१ फेब्रुवारीक तयार जातनाच आदले मतदार वळेरीचेर आदारीत पणजी महापालिकेची वेंचणूक कित्या खातीर? असो प्रस्न सीटीझन फॉर डेमोक्रॅसी संघटणेन केला. पणजी महापालिका वेंचणूक एसआयआर मोहीमेचेर आधारीत मतदार वळेरे प्रमाण घेवचें, अशी मागणी केल्या. हे विशींचें निवेदन सीटीझन फॉर डेमोक्रॅसीचे पदाधिकारी एल्विस गोम्स हांणी सादर केलें.
राज्य वेंचणूक आयोगान सोमारा पणजी महापालिका वेंचणुकेची घोशणा करतना ११ माचारक वेंचणूक घेवपाचें जाहीर केलें. १ जानेवारी २०२६ मेरेन जी आदली मतदार वळेरी आसा, ते प्रमाण ही वेंचणूक जातली. एसआयआर मोहीमे खाला निमाणी मतदार वळेरी १४ फेब्रुवारी रोजी जाहीर जावपाची आशिल्ली. आतां मतदार वळेरी जाहीर करपाची तारीख २१ फेब्रुवारी २०२६ अशी मुखार धुकल्ल्या. हाका लागून मरण आयिल्ल्या मतदारांक गाळपा सयत नव्या मतदारांचो आसपाव आशिल्ली वळेरी २१ फेब्रुवारीक जाहीर जातली. ही वळेरी जाहीर जाले उपरांत जायत्या दिसां उपरांत पणजी महापालिके खातीर मतदान जातलें. हाका लागून एसआयआरचेर पणजी महापालिका वेंचणूक घेवप सहज शक्य आसा. एसआयआर मतदार वळेेरे प्रमाण महापालिका वेंचणूक घेवची, अशी मागणी सीटीजन फॉर डेमोक्रॅसी संघटणेन केल्या.
नपेक्षा एसआयआरचेर आधारीत मतदार वळेरी वापरप कित्याक शक्य ना? हे विशींचीं आडमेळीं वा कायदेशीर बाबी आयोगान स्पश्ट करच्यो. आदल्या यादीं प्रमाण मतदान जाल्यार नव्यान आसपाव जाल्ल्या पणजेच्या मतदारांचेर अन्याय जावचो ना व्हय? हो अन्याय आयोग कसो पयस करतले, तें स्पश्ट करपाची मागणी सीटीझन फॉर डेमोक्रॅसी संघटणेन निवेदना वरवीं केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
