भांगरभूंय | प्रतिनिधी
पणजी : फाटले विधानसभा वेंचणुकेचे (2022) तुळेन एसआयआर मोहिमे उपरांत राज्यांतल्या 24 मतदारसंघांनी मतदारांचो अांकडो 2 हजारां परस चड संख्येन उणो जाला. फक्त पर्यें मतदारसंघ सोडीत जाल्यार हेर सगल्या मतदारसंघांनी 2022चे तुळेन मतदारांचो आंकडो उणो जाला. मात वास्को, मुरगांव, दाबोळी सयत 24 मतदारसंघांनी मतदारांच्या आंकड्यांचे उणे जावपाचें प्रमाण 2 हजारां परस चड आसा. ही गजाल सध्याच्या आमदारांक घाताची थारूंक शकता. तशेंच एकंदर राजकी समिकरणां बदलपाक लेगीत कारण थारूंक शकतात.
वेंचणूक आयोगान बऱ्याच वर्सां उपरांत अंदूं मतदार पडटाळणी (एसआयआर) मोहीम राज्यांत पुराय केली. गोंया सयत हेर राज्यांनी लेगीत ही मोहीम पार पडली. हे मोहिमे उपरांत 139634 नांवां वळेरींतल्यान भायर काडल्यात. वर्सागणीक मतदारांचो आंकडो वाडटा, अशें चित्र आसता. मात एसआयआर मोहिमे उपरांत मतदारांचो आंकडो उणो जाला.
2022ची वेंचणूक जाली तेन्ना उत्तर गोंयांत 542969 आनी दक्षीण गोंयांत 621255 मतदार आशिल्ले. पुराय गोंयांत वट्ट 1164224 मतदारांक मतदानाचो हक्क आशिल्लो. एसआयआर मोहिमे उपरांत राज्यांत 1057566 मतदारांची नोंद जाल्या.
फाटले विधानसभा वेंचणुके परस पर्यें मतदारसंघातल्या मतदारांचो आकडो 331न वाडला.
वास्कोंत 10 हजारां वयर
मतदारांचो आंकडो देंवलो
वास्को मतदारसंघांत 2022च्या विधानसभा वेंचणुके वेळार 35552 मतदार आशिल्ले. आतां मतदारांचो आंकडो 24743 जाला. वास्को मतदारसंघांत आतां 10809 मतदार उणें जाल्यात. हाका लागून वास्को मतदारसंघातली राजकी समिकरणां व्हड प्रमाणांत बदलतलीं.
ते भायर कुठ्ठाळी (7140), मुरगांव (4034), फोंडें (4230), फातोड्डें (3893), नावेली (3573), मडगांव (3505), पणजी (4337), ताळगांव (4269), सांता क्रुझ (4185), सांत आंद्रें (3184), कळंगूट (3245), साळगांव (3172), म्हापशें (3642) ह्या मतदारसंघांतल्या मतदारांचो आंकडो व्हड प्रमाणांत उणो जाला.
2 हजारां परस चड मतदारांचाे
आंकडो उणे जाल्ले मतदारसंघ
उत्तर गोंय: थिवी, म्हापशें, शिवोली, साळगांव, कळंगूट, पर्वरी, हळदोणें, पणजी, ताळगांव, सांता क्रुझ, सांत आंद्रें, कुमारजुंवें.
दक्षीण गोंय: फोंडें, मुरगांव, वास्को, दाबोळी, कुठ्ठाळी, नुवें, कुडटरी, फातोड्डें, मडगांव, नावेली, कुकळ्ळी, वेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
