भांगरभूंय | प्रतिनिधी
हेर राज्यांं सयत एप्रीलात पोटवेंचणूक जावपाची चिन्ना
पणजी : एसआयआर प्रक्रीयेचेर आदारीत मतदार वळेरी तयार जाले उपरांंत गोंंयांंत सगळ्यात पयली फोंडें मतदारसंघांत पोटवेंचणूक जातली. पश्चीम बंंगाल, आसाम, केरळ, तमीळनाडू ह्या राज्यांंनी मे म्हयन्यापयली विधानसभा वेंचणुको जावपाच्यो आसात. ह्या राज्यां सयत फोंडें मतदारसंंघाची पोटवेंचणूक जातली, अशी म्हायती वेंचणूक अधिकाऱ्या कडल्यान मेळ्ळी.
एसआयआर प्रक्रिये खाला मतदारांंनी म्हायतीचे अर्ज सादर केल्या उपरांंत हरकतींचेर सुनावणी घेवपाची प्रक्रिया सुरू आसा. हरकतींचेर सुनावणी जाले उपरांंत फेब्रुवारीत निमणी वळेरी जाहीर जातली. हे वळेरीचेर आदारीत सगळ्यांंत पयली फोंडें मतदारसंंघा खातीर पोटवेंचणूक जातली. हाका लागून फाटले वेंचणुकीच्या तुळेत हे खेपे फोंडें मतदारसंंघातल्या मतदारांंच्या आंकड्यांत व्हड बदल जावप शक्य आसा.
मजगतीं, फोंडें पोटवेंचणुके खातीर सरकार म्हजेच भारतीय जनता पक्षान तयारी सुरू केल्या. सरकारी पांवड्याचेर फोंडें मतदारसंंघांत व्हड प्रमाणांत कार्यावळी सुरू जाल्या. राज्याचे शेतकी मंंत्री रवी नायक हांंकां 14 ऑक्टोबर 2025 च्या रातीक उसरा मरण आयले. हाका लागून फोंडें मतदारसंंघा खातीर 6 म्हयन्या भीतर पोटवेंचणूक घेवप बंंदनकारक आसा. ही मुजत 15 एप्रील 2026 दिसा सोंपता. हाका लागून 15 एप्रील पयली फोंडें मतदारसंंघा खातीर पोटवेंचणूक घेवची पडटली. विधानसभेचे अर्थसंंकल्प अधिवेशन 6 मार्च ते 27 मार्च मेरेन चलतले. हाका लागून एप्रीलांत पोटवेंचणूक जावपाची चिन्ना आसा. पश्चीम बंंगाल, तमीळनाडू, आसाम, केरळ ह्या राज्यांंच्या विधानसभांची मुजत मे म्हयन्यात सोंपता. हाका लागून पांवड्या पांवड्यान मार्च / एप्रीलांत ह्या राज्यांनी वेंचणुको जातल्यो. ह्या वेंचणुका बराबर फोंडेची पोटवेंंचणूक जातली.
फोंडा पोटवेंचणुकेची तारीख जाहीर जावंंक नासली तरी भाजपान सरकारी पावंंड्याचेर तयारी सुरू केल्या. आयज सरकार तुमच्या दारी उपक्रमाची पयली कार्यावळ फोंडा म्हालात जाता. हे कार्यावळीक मुख्यमंंत्री डॉ. प्रमोद सावंत हाजीर आसतलें. हे कार्यावळीक येवजणेच्या अर्जांंचे वांटप जातलेंं. तशेच आयज जावपी परिक्षा पे चर्चा कार्यावळीत मुख्यमंंत्री फोंडेंच्या विद्यालयांत उपस्थीत रावन कार्यावळींत वांटो घेतले. मुख्यमंंत्री डॉ. प्रमोद सावंंत हांंणी फोंडें मतदारसंंघांतल्यो भेटी वाडोवपा सयत जनसंंपर्क सुरू केला.
काँग्रेस वा हेर विरोधी पक्षांं कडल्यान मात आजून मेरेन हालचालींक नेट येवंंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
