भांगरभूंय | प्रतिनिधी
खबरां संस्था
बीजिंगः आशियाई खेळां सर्तीत नेमबाजींत भारताक चवथें भांगरा पदक मेळ्ळें. बिरेस्तारा सर्तीच्या पांचव्या दिसाची सुरवात भारतान भांगरा पदकान केली. भारताच्या दादल्यांच्या पंगडान 10 मीटर ऍर पिस्तूल प्रकारांत भांगरा पदक मेळयलें. तशेंच दोन नेमबाजांनी वैयक्तीक फायनल फेरयेंत प्रवेश केलो. भारता वतीन नेमबाज सरबजोत सिंग, अर्जुन सिंग चीमा आनी शिवा नरवाल हांणी फायनल फेरयेंत चीनाक हारोवन अव्वल सुवात मेळयली.
भारतीय नेमबाजांनी आता मेरेन चार भांगराची, चार रुप्यांची आनी पांच कांस्या पदक मेळयल्यांत. सरबजोत, अर्जुन आनी शिवान पात्रताय फेरयेंत वट्ट 1734 गुण मेळयले. जे चीनाच्या पंगडा परस एक गुणान चड आसा. चीनाक रुप्याचे आनी व्हिएतनामाक कांस्या पदक फावो जालें. सरबजोत आनी अर्जुनान आठ नेमबाजांचे निमाणे फेरयेंत प्रवेश केला. ते वैयक्तीक पदाचे सर्तींत आसात.
सांघीक सर्तींत भारताक तिसरें भांगरा पदक
पात्रताय फेरयेंत सरबजोतान 580, अर्जुन चीमान 578 आनी शिवा नरवालान 576 गुण मेळयले. नेमबाजींतले सांघीक सर्तींत भारताचे हें तिसरें भांगरा पदक आसा. हाचे पयलीं भारतान 10 मीटर ऍर रायफल आनी बायलांचे 25 मीटर पिस्तूल प्रकारांत सांघीक भांगरा पदक जिखल्लें. 22 वर्सां पिरायेच्या सरबजोतान पात्रताय फेरयेंत पांचवे सुवातेर रावून वैयक्तीक फायनलींत प्रवेश केला. ताणे अदूं भारतांत भोपाळ हांगा जाल्ले आयएसएसएफ संवसारीक करंड सर्तींत वरिश्ठ पांवड्यार पयलें वैयक्तीक भांगरा पदत जिखल्लें. चीनान आठवी सुवात मेळोवन फायनलींत प्रवेश केल्लो. पात्रतायेंत सरबजोताची गुण माळ 97, 96, 97, 97, 96 आनी 95 आशिल्ली. चीमाची 97, 96, 97, 97, 96 आनी 95 अशी आशिल्ली.
रोशिबिना इतिहास करपाक अपेशी
भारतीची वुशू खेळगडी रोशिबिना देवी इतिहास रचपाक अपेशी थारलें. ताका भांगरा पदक जिखपाची संद आशिल्ली. मात फायनलींत ताका हार खावची पडली. चीनाच्या बायल खेळगडीन बायलांचे 60 किलो गटांत रोशिबिना देवीक हारोनव भांगरा पदक जिखलें. रोशिबिना फायनल जिखपाक येशस्वी थारिल्लें जाल्यार तें इतिहास रचताशिल्लें. आशियाई खेळां सर्तींत भारताक वुशूंत केन्नाय भांगरा पदक जिखप शक्य जालें ना. ताकां भांगरा पदक जिखपाची संद आशिल्ली मात ती ताणे वोगडायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
