भांगरभूंय | प्रतिनिधी
खबरां संस्था
हांगझोऊः आशियाई खेळां सर्तीच्या (एशियाड) आठव्या दिसा भारतान आनीक 7 पदकां मेळयलीं. ताचे सयत आतां मेरेन भारताच्या खात्यांत भांगराचीं 8 रुप्यांची 12 आनी कांस्यांची 12 मेळून वट्ट 32 पदकां जाल्यांत. शुक्राराक भारतीय नेमबाजांनी भांगराची 2, रुप्याचीं 3 पदकां जिखली. टॅनीसांत रामकुमार रामनाथन आनी साकेत मायनेनी जोडयेन रुप्या पदक मेळयलें. स्क्वॉशांत भारताच्या दादल्याच्या पंगडान कांस्या पदक मेळयलें.
भारताच्या दादल्यांच्या बॅडमिंटन पंगडान नेपाळाक 3-0 अशें हारोवन 37 वर्सां उपरांत एशियाडांतलें पदक निश्चीत केलें. भारताची बॉक्सर निखत जरीनान 50 किलोग्राम व्हेड गटांत उपांत्य फेरयेंत प्रवेश करून एक पदक निश्चीत केलां. तशेंच निखतान 2024च्या पॅरीस ऑलिम्पिका खातीर पात्रताय मेळयल्या.
भारताचो नेमबाज ऐश्वर्य प्रताप सिंगान आनीक एक पदक आपल्या नांवार केले. ताणे शुक्राराक सांघीक सर्त जिखल्या उपरांत दादल्याचे वैयक्तीक 50 मीटर रायलफ तीन पोझिशनाच्या फायनलींत रुप्या पदक जिखले. ताणे 459.7 गुण मेळयले. आशियाई सर्तींत चीनाच्या लिन्सून विक्रम करून 460.6 गुणान भांगरा पदक मेळयलें. भारताच्या स्वप्नील सुरेश बरोच वेळ पयले सुवातेर रावलो मात निमाण्या खिणात तो फाटीं पडलो. ताका चवथे सुवातेर खोस मानची पडली.
भारताच्या स्कॉश पंगडाक कांस्या पदक मेळ्ळें. उपांत्य फेरयेत तांका हाँगकाँगा कडल्यान हार खावची पडली. अनहत सिंगाक चीनाच्या ली कडल्यान 10-12 अशी हार खावची पडली. ताचे पयलीं तन्वी खन्नाक लेगीत हार खावची पडिल्ली. जोश्ना चिनप्पान दुसरी गेम जिखून भारताक बोरोबोरींत हाडल्लें. मात अनाहताचे हारीक लागून पंगडाक फायनलींत प्रवेश मेळपाक शकलो ना.
नेमबाजींत भांगर
स्वप्नील कुसाळे, ऐश्वर्य प्रतास सिंग, अखिल वरण ह्या दादल्यांच्या पंगडान 50 मीटर रायफल तीन पी सर्तींत भारताक भांगरा पदक जिखून दिलें. ईशा, दिव्या आनी पलक ह्या बायलांच्या पंगडान 10 मीटर ऍर पिस्तूल प्रकारांत रुप्या पदक मेळयलें. भारताच्या नेमबाजांनी वट्ट 15 पदकां जिखल्यांत. भांगरा पदक जिखपा वांगडाच दादल्यांच्या पंगडान संवसारीक विक्रम केलो. भारतीय पंगडान 1769 गुण मेळयले. चीनान 1763 गुणांनी रुप्या पदक आनी दक्षीण कोरियान कांस्या पदक मेळयलें. पलकान वैयक्तीक 10 मीटर ऍर पिस्तुलांत भांगरा पदक जिखलें, ईशा सिंगान बायलाच्या 10 मीटर ऍर पिस्तुलांत रुप्या पदक मेळयलें.
टॅनीसांत रुप्या पदक
भारतान दादल्यांच्या दोट्टींत रुप्या पदक मेळयलें. साकेन माइनेनी आनी राजकुमार रामनाथन फायनलींत हार खावची पडली. चीनी तायपेच्या जेसन आनी यू हसीउ जोडयेन तांका 6-4, 6-4 अशें हारयलें, मिश्र दोट्टींत रोहन बोपन्ना आनी ऋतुजा भोसले जोडी फायनलींत पावली. उपांत्य फेरयेंत ताणी चीनी तायपेच्या जोडयेक 2-1 अश्या सेटांनी हारयलें. भारताच्या बायल पंगडान स्क्वॅशांचे उपांत्य फेरयेंत प्रवेश केला. ताकां हाँगकाँगाक कडल्यान हार खावची पडल्ल्यान कांस्या पदकार तांका खोस मानची पडली. दादल्यांच्या गटांत भारतीय पंगडान मलेशियाक हारोवन उपांत्य फेरयेंत प्रवेश केला.
भारताच्या ऐश्वर्या मिश्रान बायलांच्या 400 मीटर सर्तींत 52.73 अशी वेळ नोंद करून फायनलींत प्रवेश केलो.
बॅडमिंटन पदक निश्चीत
बॅडमिंटनांत भारतान एक पदक निश्चीत केला. दादल्याच्या उपांत्यपूर्व फेरयेंत भारताच्या लक्ष्य सेन, किदांबी श्रीकांत आनी मंजुनाथ मिथनान नेपाळी पंगडाक हारोवन उपांत्य फेरयेंत प्रवेश करून एशियाड पदक निश्चीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
