एवरग्रीन वर्षा

भांगरभूंय | प्रतिनिधी

आज 8 मार्च आंतरराष्ट्रीय महिला दीस. ते निमतान सिने-नाट्य अभिनेत्री वर्षा उसगांवकार हांची लेखिका आनी फिल्म निर्माती ज्योती कुंकळकार हांणी घेतिल्ली खास मुलाखत.

खूब लड़ी वह मर्दानी झांसीवाली रानी थी… दूरदर्शना वयल्यान हें शिर्शकगीत कानार सादतालें आनी मागीर तरसादी सारकी तेजाळ व्यक्तिमत्वाची झांशीची राणी पडद्याचेर प्रगट जाताली. हेमामालिनीन निर्माण केल्ले आनी रवी चोपडा हांणी दिग्दर्शीत केल्ले ‘झांसी की रानी’ हे दूरदर्शन माळेंत वर्षा लाखांनी दर्शकांचे नदरे मुखार येवन गेलें.

1995 त ही मालीका प्रसारीत जाली. पूण अजूनी ते अभिनेत्रीची तीच उर्जा, तोच आत्मविस्वास, तेच सौंदर्य, काम करपाची ती जिद्द – चिकाटी आनी सगळ्यांत म्हत्वाचें म्हणल्यार सातत्य राखपी ती नाट्य सिने अभिनेत्री म्हळ्यार आमचे- तुमचे गोंयचें बाय वर्षा उसगांवकार.

1) बाय वर्षा 30 वर्सां पयलीं हांवें तुज्यो मालिका वा तुजें पयलेंच नाटक ‘ब्रह्मचारी’ पळयलें आनी आतां तुजें हांवें ‘कसंतरी होतं’ हें नाटक पळयलें. तेंच सौंदर्य, तुजी ऍन्ट्री पळोवन म्हाका ‘ब्रह्मचारी’ चो अभिनय याद जालो, हे सगळें पळयतकच तू अजून तशेंच आसा, हाची खात्री पटली; हाचे खातीर तू कितें करता?

वर्षा : देवाची कृपा. बरीं- बरीं कामां मेळत गेलीं. देव दरेकल्याक वेगवेगळे टॅलंट दिता. तांचो दरेकल्यान योग्य उपेग करपाक जाय. केन्ना- केन्ना चुकोय जाता. म्हजे कडल्यानय जाल्यात. केन्ना आपली उर्जा नाका थंय घालता. पूण आपणें रोखडेंच शाणें जावपाक जाय. देवान म्हाका रंग- रूप दिलां, अभिनय करपाची आवड आसा म्हणटकच हांव करतना सगळे तरेची काळजी घेता. सगळ्यांत म्हत्वाचें म्हणल्यार रसिकांचो मोग. तो बरो तट्‌तट्टीत दवरता.

2) मनशांकडें सातत्य आसप खूब म्हत्वाचें. तें सातत्य तुवें दवरलां. जायराती, नाटकां, फिल्मां, मालिका, गाजिल्ल्या ‘महाभारता’ सारक्या मालिकेंत तूं आशिल्लें. बीग बॉस, कपिल शर्मा हे टॉक शोंतूय तूं दिसलें. तांतूंत व्हडले- व्हडले सेलीब्रेटी येतात. ह्या दोनूय कार्यावळींनी तुकां आमत्रित केल्लें तेन्ना लोकप्रीयता कळ्ळी. तुका कितें दिसता?

वर्षा: हय, जेन्ना म्हाका कपिल शर्माचे टिमीचो फोन आयलो आनी ताणें सांगलें तुका आमी आमच्या टॉक शोन आमंत्रीत करतात. म्हाका अजाप जालें. कारण एखादे फिल्म रिलीज जावपाचें आसल्यार तशे ते आपयतात, पूण मागीर चवकशी केल्या उपरांत कळ्ळे, तांणी 90 दशकातल्या काय नायिकांचें लिस्ट काडिल्लें. हांव, संगीता बिजलानी आनी मधू हांची निवड जाली. म्हणून हांव ‘टॉक शो’त गेले. बरे दिसलें. संगीता बिजलानी बरोबर काम केलां. ‘बिग बॉस’ कार्यावळींत एक दोनदा आपयिल्लें, पूण वचपाक मेळूना. पूण खूप रसिक म्हाका विचारताले, ‘‘तू वचना?’’ आनी हे फावट ती संद घेतली. कांय लोकांनी सांगलें, तुजे खातीर न्ही ते, तिका बरे स्ट्रॉग झगडपाक येवपाक जाय, तू रोखडेंच भायर पडटले, पूण बरेच दीस उरलें, हे तुमी पळयलां आसतलें. एक वेगळो अणभव घेतलो.

3) एका चॅनेलांचेर पुरस्कार वितरण समारभांत माधुरी दीक्षिताक विचारलें, तुजी मराठींतली आवडटी अभिनेत्री खंयची? तिणे रोखडेंच सांगलें, वर्षा उसगांवकार, तेदे वेळार तुका कितें दिसले?

वर्षा: हय, हांव आशिल्ले तेन्ना. एक प्रतिभावंत बॉलिवूड अभिनेत्री म्हजें नांव घेता, हाचो म्हाका अभिमान दिसलो.

4) आज काल गोंयांत आनी गोंया भायर तूं स्टेज ऑर्केस्ट्रा करता. खरें म्हणल्यार तू बिझी आसता तरी तू करता. पयर मडगांवा तुजीं पदां बरीच श्रोत्यांक आवडली, तुका पदां म्हणपाक आवडटा?

वर्षा: हय. भुरगेपणा पसून म्हाका गावपाची आवड. शास्त्रीय संगितांत म्हजें मन रमता. अभिनेत्री जावंक नाशिल्ले जाल्यार हांव गायिकाच जावपाचें. ऑर्केस्ट्रा सारक्या कार्यक्रमांक हांव सर्वसामान्य लोकां मेरेन पावता. सामकें खेड्यापाड्यांनी. म्हज्यो कॅसेटी आनी आल्बम आयल्यात. म्हाका गावपाकूय खूब आवडटा.

5) बाय वर्षा हांव तुका खूब वर्सां जालीं वळखता. हांवे तुका पयलें पळयलें, ‘खळार-मळारां’त. हांवूय थंय येतालें. तुजो रूबाब, चलपाची स्टायल म्हाका आवडली. तुजो सभाव हांव पळयत आयलां. मदीं-मदीं हांव तुका मेळटा. पूण तशें नम्र वागपाची, उलोवपाची तरा, यश तुज्या तकलेन वचूना. घडये या सभावा खातीर लोकांक तूं चड आवडटा.

वर्षा: हय. हें म्हजें सगळें आवय- बापायचे संस्कार. आमगेर खूप लोक येता- वताले. पापा मंत्री आसतना आमचो लोकां कडें खूब संबंध येतालो. त्याच संस्कारान हांव वाडलां. लोकांक म्हजो अभिनय आवडटा. आतां तर फोटो काडपाक खूब गर्दी करता, टायम वता. पूण दुखोवपाक म्हाका आवडना. म्हाका म्हजें रसिक, सोयरी- धायरीं, मित्र मंडळ प्रिय आसा.

6) सिनेमासृष्टींत तिगून उरपा खातीर एखाद्या कलाकाराक कितें करचें पडटा?

वर्षा : हे विश्व बेगडी, दर दिसा नवें- नवें सितारे येतात. आपलें करियर करपाक धडपडटात. हांगा आकांताची सर्त आसा. निर्माते – दिग्दर्शक, अभिनेते आपल्या भुरग्यांक घेवन तांकां ह्या क्षेत्रांत येवपाक वावुरतात. जांकां गॉड फादर नासता ताणे आपले ताकदीचेर, बुद्धीचेर आनी प्रामाणिकपणान काम करपाक जाय. जो मेरेन इत्साशक्त आनी सातत्यान कश्ट करचे पडटात. जाल्यारूच हांगां तिगाव लागता. नाजाल्यार कितले लोक येता आनी कितलो लोक वता आचो हिशोब आसना.

7) मात तुजी तोखणाय दिसता, गेलीं 30- 35 वर्सा तू सातत्यान काम करीत आसा. जायराती, मालिका, नाटक, सिनेमा हे सातत्य कशें लागलें?

वर्षा: हय म्हाका हे सगळे प्रकार आवडटा. हालींच्या काळार जायरातींच्या माध्यमांतल्यान अभिनय, कल्पकता आनी सृजनशीलतेक बरोच वाव मेळटा आनी तीय काय सेकंदाची जाहीरात आसता. देखून जायरातीय करप हें एक आव्हान दिसता. म्हणून वेळाचें वेवस्थापन पयलें करचें पडटा. बी. आर. चोप्रांचे ‘महाभारता’त उत्तराची भुमिका म्हज्या वाट्याक आयली. तेन्ना हांव फिल्मात व्यस्त आशिल्लें. पूण सगळें वेवस्थापन करून हांव अशा तरेच्यो मालिका करता. जॅकी श्रॉफ, चंकी पांडे, मिथुन चक्रवर्ती, नसिरूद्दिन शहा, ऋषी कपूर हांचे बरोबर हिन्दी फिल्मा केल्यांत, तेन्ना मराठी फिल्मा, जांव नाटकां हांचे कडें हांवें फाट करूना. वेवस्थित सातत्य राखलां. आनी कोंकणीय सिनेमा केल्यात. तुज्याय फिल्मांत हांवें काम केलां. एखाद्या कार्यक्रमा खातीर गोंयात आपयता तेन्ना हांव शेड्यूल एडजस्ट करून येता, कारण  गोंयात म्हणल्यार कुळारा येवपाक आवडटा. एका दिसाच्या कामाक आयल्यार लेगीत तीन दीस वताच, तरी हांव येता. म्हजें गोंय म्हाका चड प्रिय.

–

वर्षाविशीं म्हाका सद्दांच आदर आनी अभिमान. कारण गोंयात जायतीं बायलां कलाकार जावन गेलीं. जायत आसात. पूण आमी उत्सवांची नाटकां, सर्तीतलीं नाटकां इतले मेरेनूच सीमित उरतात. मागीर आमी खंयतरी कुटुंबीक राटावळींनी, संवसारीक बंधनांनी, नोकऱ्यो, सामाजीक सीमारेषेंत बंदिस्त उरतात. वर्षान मात हीं सगळीं बंधनां तोडून उडयलीं. आपल्या आवडीच्या मार्गार योग्य तरेन गेलें, करियर केलें. गोंयच्या स्त्री कलांकाराक एक पर्वतायेदें आव्हान थारचें अशें कर्तुत्व निर्माण केलें, म्हणून म्हाका तांचो अभिमान.