भांगरभूंय | प्रतिनिधी
नवी दिल्ली, खबरां संस्था ः आयज बायलां दिसा निमतान सरकारान एलपीजी सिलिंडराचे दर 100 रुपया उणे करपाचो निर्णय घेतला. हाका लागून देशभरांतल्या लाखांनी घरां वयलो अर्थीक भार उणो जातलो. खास करून हाचो फायदो नारी शक्तीक जातलो अशें प्रधानमंत्री नरेंद्र मोदी हांणी ट्विट करुन सांगलें.
मंत्रीमंडळ बसकेंत प्रधानमंत्री उज्ज्वला येवजणेच्या लावार्थ्यांक दर सिलिंडराक 300 रुपया सवलत फुडल्या एका वर्सा खातीर वाडयल्या. ह्या अनुदानाची मुजत मार्च 2024 मेरेन आशिल्ली, पूण आतां ती एक वर्स वाडोवन मार्च 2025 मेरेन केल्या. धा कोटी परस चड कुटुंबांक हाचो फायदो जातलो अशें कॅबिनेट मंत्री पियुष गोयल हांणी मंत्रीमंडळ बसके उपरांत घेतिल्ले पत्रकार परिशदेंत सांगलें.
हाचे भायर केंद्र सरकाराच्या कर्मचाऱ्यांचो (Dearness Allowance) आनी पेन्शन धारकांचो (Dearness Relief) म्हारगाय भत्तो 4 टक्क्यांनी वाडोवपाचो निर्णय घेतला. हे वाडीक लागून आतां म्हारगाय भत्तो 46 टक्क्यां वयल्यान 50 टक्क्यांनी वाडला.
निमाणी वाड ऑक्टोबर 2023 वर्सा जाल्ली. त्या वेळारय चार टक्क्यांनी वाड जाल्ल्यान म्हारगाय भत्तो 46 टक्क्यां मेरेन पावलो. कर्मचारी आनी पेन्शन धारकांचो म्हारगाय भत्तो वाडिल्ल्यान सरकारी खजिन्याचेर 12 हजार कोटींचो भार पडटलो. 49.18 लाख केंद्रीय कर्मचारी आनी 67.95 लाख पेन्शन धारकांक हाचो फायदो जातलो. ही वाड सातव्या वेतन आयोगान केल्ल्या शिफारशींचेर आदारीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
