भांगरभूंय | प्रतिनिधी
नवी दिल्ली, खबरां संस्था ः एलन मस्काची स्टारलिंक ही सॅटेलाइट इंटरनॅट सेवा दिवपी कंपनी आतां बेगीन भारतांत प्रवेश करपाची तयारी करता. हाचे पयलीं कंपनीचेर परवानो नासतना ही सेवा चलोवपा खातीर बंदी घाल्ली. पूण आतां एलन मस्कान सगळ्या सरकारी मंत्रालयांतल्यान मान्यताय मेळ्ळ्या उपरांत स्टारलिंक सेवा सुरू करपाचे तयारीत आसा.
स्टारलिंक सेवा सुरू जाले उपरांत जियो आनी एअरटेलाच्यो समस्या वाडूंक शकतात. कारण आतां एअरटेल आनी जियो हे दोनूय सॅटेलाइट इंटरनॅट सर्तींत वांटेकार जाल्यात. एअरटेल वन वेब वरवीं सॅटेलाइट सेवा सुरू करता. सॅटेलाइट सेवां खातीर जियोन लक्झेंबर्ग कंपनी एसईएस कडेनय भागीदारी केल्या.
स्टारलिंक सॅटेलाइट इंटरनेट सेवेची सगळ्यांत चड गती 1.5 ते 2 जीबीपीएस आसूं येता असो दावो केला. नांवा प्रमाण ही एक सॅटेलाइट सेवा. हाका मोबायल टॉवराची गरज पडची ना. हाका लागून देशांतल्या पयसुल्ल्या वाठारांनी लेगीत इंटरनेट सेवा सोंपेंपणान पावपाक मजत जातली. सध्या स्टारलिंक 40 परस चड देशांक सेवा दिता. एलन मस्काच्या स्टारलिंग सेवेंत वाय-फाय राऊटर, वीज पुरवण, केबल आनी माउंटिंग ट्रायपॉड हांचो आस्पाव जाता. हो राऊटर सॅटेलाइटाक जोडिल्लो आसता.
स्टारलिंकान 2021 वर्सा परवानो घेनासतना आपली सेवा सुरू केल्ली. हाचे वांगडाच तांणी ही सेवा सुरू जावचे पयलीं प्री-ऑर्डर म्हणून गिरायकां कडल्यान सुरक्षा म्हणून पयशेय एकठांय केल्ले. पूण भारत सरकाराची मान्यताय मेळूंक नाशिल्ल्यान एलन मस्काक आपलो प्रकल्प थांबवचो पडलो. तशेंच भारतीय गिरायकांचे पयशे परत करचे पडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
