भांगरभूंय | प्रतिनिधी
प्रमाणपत्रां सादर करूंक ना जाल्यार अपात्र थारतले
पणजी ः एलडीसी भरती खातीर घेतिल्ले सीबीटी-2 परिक्षे उपरांत कांय उमेदवारांची प्रमाणपत्रां परतून तपासतले. परतून तपासणी खातीर ह्या उमेदवारांक नोटीसींत सांगिल्लीं प्रमाणपत्रां सादर करचीं पडटली. नोटीस जारी केल्ल्या उमेदवारांनी प्रमाणपत्रां सादर करूंक ना जाल्यार फुडले सीबीटी परिक्षे खातीर तें अपात्र थारतलें अशें कर्मचारी भरती आयोगान स्पश्ट केलां.
नोटीसींत उमेदवाराचें नांव सादर करपाक आवश्यक आशिल्लें प्रमाणपत्र नमूद केलां. गरजेची म्हायती आयोगाच्या संकेतथळार आसा. एलडीसी पदा खातीर सीबीटी-2 परिक्षा घेवन आयोगान निकाल जाहीर केला. सीबीटी-3 परिक्षे खातीर पात्रताय वळेरी सीबीटी-2 परिक्षेंतल्या गूणांचेर आदारून तयार करतले. ही वळेरी तयार करचे पयलीं आयोगान कांय उमेदवारांक प्रमाणपत्रां सादर करपाक सांगलां. आयोगान 77 उमेदवारांक अणभव प्रमाणपत्र सादर करपाक सांगलां. ते भायर एक्स सर्वीसमॅन गटांतल्या 84 उमेदवारांनी निवृत्ती वा सेवेंतल्यान मुक्त केल्ल्याचे प्रमाणपत्र सादर करप गरजेचें आसा. खेळगडे गटांतल्या 20 उमेदवारांक खेळगडो प्रमाणपत्र (स्पोर्टसमॅन सर्टिफिकेट) सादर करपाक सांगलां. तांच्या प्रमाणपत्रांची तपासणी 24 आनी 25 फेब्रुवारीक सुचोवणेंत सांगिल्ल्या वेळार जातली. हाचे भायर दिव्यांग गटांतल्या 52 उमेदवारांक दिव्यांग प्रमाणपत्र/वैजकी प्रमाणपत्र सादर करपाक सांगलां. दिव्यांग गटांतल्या उमेदवारांनी 25 फेब्रुवारी मेरेन [email protected] ह्या ईमेलाचेर प्रमाणपत्र धाडचें अशें सुचोवणेंत नमूद केलां.
नोटीस जारी केल्ल्या उमेदवारांच्या प्रमाणपत्रां संबंदी दुबाव आयिल्ल्यान आयोगान तांकां परतून तपासणी खातीर प्रमाणपत्रां परतून सादर करपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
