भांगरभूंय | प्रतिनिधी
-परिक्षा जातली 7 टप्प्यांनी; 2 फेब्रुवारी उपरांत निकालपणजीः कर्मचारी भरती आयोगा वरवीं 232 एलडीसी पदां खातीर केल्लो संगणक बेस (सीबीटी) परिक्षा 11 जानेवारी सावन सात टप्प्यांनी जातली. ह्या 232 पदां खातीर सुमार 22 हजार उमेदवारांनी अर्ज केला.
सरकारी खात्यांतल्या 232 एलडीसी आनी 53 स्टेनोग्राफर सयत 285 पदांचेर भरती करपा खातीर कर्मचारी भरती आयोगान 21 नोव्हेंबराक जायरात जाहीर केल्ली. हे जायरातीक राज्यभरांतल्या तरणाट्यांचो उपाट प्रतिसाद मेळ्ळो. एलडीसीच्या 232 पदां खातीर सुमार 22 हजार लोकांनी परिक्षे खातीर अर्ज केला. ते खातीर आयोगान सात टप्प्यांनी ही परिक्षा घेवपाचो निर्णय घेतला. 3 जानेवारी पयलीं उमेदवारांक परिक्षेच्या सुवातीं विशीं आयोगाचे संकेतथळा वरवीं कळयतले. तशेंच 2 फेब्रुवारीचो निमाणो पांवडो पुराय जातकच परिक्षेचो निकाल जाहीर जातलो अशें आयोगान जारी केल्ल्या नोटिशेंत नमूद केलां.
मजगतीं, सरकारी नोकऱ्यांनी भ्रश्टाचार जावचो न्हय हे खातीर मुख्यमंत्री डॉ. प्रमोद सावंत हांणी कर्मचारी भरती आयोगा वरवीं सरकारी नोकऱ्यांच्यो ‘सी’ वर्गाची पदां भरपाचो निर्णय घेतलो. ते प्रमाण आयोगान डिसेंबर 2023 वर्सा पयली जायरात जाहीर केली. ते उपरांत आयोगान फाटल्या वर्सा सुमार बारा परिक्षा घेतल्यात. मंडळाच्यो परिक्षा संगणका वरवीं जातात तशी ती पुरायपणान पारदर्शक आसता. देखून दरेक परिक्षेच्या वेळार राज्यांतले चडांत चड तरणाटे कर्मचारी भरती आयोगाची परिक्षा घेवपाची उमेद बाळगतात हें दिसता.
……………………………
परिक्षेचे टप्पे
पयलोः 11 जानेवारी
दुसरो : 12 जानेवारी
तिसरो : 18 जानेवारी
चवथो : 19 जानेवारी
पांचवो : 25 जानेवारी
सवो: 1 फेब्रुवारी
सातवो: 2 फेब्रुवारी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
