भांगरभूंय | प्रतिनिधी
परंपरीक नुस्तेंकार: नुस्तें उद्देग खात्याचें कवतूक
भांगरभूंय । प्रतिनिधी
वास्को : एलईडी लायटीचो वापर करून नुस्तेमारी करप्यां आड गोंय नुस्तें उद्देग खात्यान फक्त दंडात्मक कारवाय करची न्हय, जाल्यार संबंदीत बोट आनी एलईडी लायटीय जप्त करपाची गरज आसा, अशें मत परंपरीक नुस्तेमार भावांनी उक्तायलें. सोमारा घेतिल्ले पत्रकार परिशदेंत तांणी नुस्तें उद्देग खात्याची संचालक यशस्विनी तशेंच खात्यान केल्ले कारवायेचें कवतूक केलें. तशेंच फुडारांत लेगीत अशी कारवाय करपाची गरज आसा, अशें म्हणलें.
परंपरीक नुस्तेमार ओलंसियो सिमोयस हांणी सांगलें, एलईडी लायटीचो वापर करून नुस्तेमारी करपाक प्रतिबंध करपी कायदो 2015 त देशभरांत लागू केला. तरी लेगीत गोंयच्या दर्यांत एलईडी लायटीचो वापर करपी एकाय बोट धनया आड फाटल्या 10 वर्सांत कारवाय जावंक नाशिल्ली. पयलेच खेपे एक बोट शापोरा दर्यादेगेर धरल्या. हाचे वयल्यान गोंयचे दर्यादेगेर एलईडी लायटीचो वापर करून नुस्तेमारी करतात, हें सिद्ध जाता.
नुस्तेमारी करपी बोट धनी 150 केव्ही जनरेटराचो वापर करतात. ह्या प्रकरणांत आमी हरकत घेतिल्ली. तेन्ना नुस्तें उद्देग खात्याच्या तेन्नाच्या संचालकान त्या बोटीं खातीर 150 केव्ही जनरेटराची गरज आसा, अशें प्रतिज्ञापत्र उच्च न्यायालयांत दाखल केल्लें. पूण 150 केव्ही जनरेटर हो एलईडी लायटी खातीर वापरताले हें सिद्ध जाता. हे संबंदांतलें प्रकरण उच्च न्यायालयांत प्रलंबीत आसून लेगीत संबंदीत बोट धनी बिनधास्त एलईडी लायटीचो वापर करून नुस्तेमारी करतात. तांकां पुलीस, नुस्तें उद्देग खातें आनी हेरांचो भंय ना, अशें दिसून येता. नुस्तें उद्देग खात्यान बेकायदो नुस्तेमारी करप्यां आड कारवाय करपाची गरज आसा. तांकां दंड घालून कसलोच फायदो ना, तांच्यो बोटी जप्त करपाक जाय, अशें ओलंसियो सिमोयस हांणी सांगलें. क्लिडोदियो डिसोझा हांणी सांगलें, हे कारवायेक लागून आमची उमेद वाडल्या. हे तरेची कारवाय जावपाची गरज आसा. कर्नाटक आनी हेर राज्यांतल्यो नुस्तेमारी बोटी गोंयचे दर्यादेगेर येवन नुस्तेमारी करतात. तांचे आड कारवाय करचे खातीर पावलां उबारपाची गरज आसा. तशेंच दंडाची रकम वाडोवपीच गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
