भांगरभूंय | प्रतिनिधी
पणजी : समाज कल्याण खात्या वतीन चालीक लायिल्ले दयानंद समाजीक सुरक्षा येवजण (डीडीएसवाय) खाला कांय लाबार्थ्यांक पुराय रकम मेळना. ह्या लाबार्थ्यांक खात्या कडल्यान दितात ती रकम वेळार जरी मेळटा आसली तरीय एलआयसी कडल्यान मेळपी रकत 2024 सावन प्रलंबीत आसा. खात्यान हालींच हे विशीं एसआयसीच्या अधिकाऱ्यां वांगडा बसका घेतल्या. खात्यान प्रलंबीत पयशां संबंदांत एलआयसी कडेन कारणां मागयल्यांत. फुडल्या सप्तकांत हे विशींची फाटपुरवण करतले, अशी म्हायती खात्यांतल्या वरिश्ठ अधिकाऱ्यांनी दिल्या.
मेळिल्ले म्हायती प्रमाण दयानंद समाजीक सुरक्षा येवजणे खाला ज्येश्ठ नागरीक, विधवा, दिव्यांक, ज्येश्ठ नागरीक, एचआयव्ही/ एड्स दुयेंतींक निधी दितात. ते प्रमाण लाबार्थ्यांक दर म्हयन्याक 2 हजार रुपया दितात. तातूंतले 975 रुपया खात्या कडल्यान जाल्यार 1025 रुपया एलआयसी कडल्यान दितात. फाटले कांय म्हयने सुमार 4 हजार 300 लाबार्थ्यांक तातूंतले खात्या कडल्यान दितात ते 975 रुपया मेळटात, मात उरिल्ले 1025 रुपया एसआयसी कडल्यान दिवप प्रलंबीत आसात. लाबार्थ्यांनी बदलिल्लीं बँक खातीं आनी हेर कारणांक लागून ही रकम प्रलंबीत उरपाची शक्यताय खात्यांतल्या वरिश्ठ अधिकाऱ्यांनी उक्तायल्या.
सुमार वर्सभर हे येवजणेचे अर्द्या परस अदीक पयशे प्रलंबीत आशिल्ल्यान लाबार्थ्यांक अर्थीक तशेंच मानसीक त्रास सोंसचे पडटात. ज्येश्ठ नागरिकांक अर्थीक मजत दिवपाच्या उद्देशान सरकारान ही येवजण सुरू केल्ली. मात प्रत्यक्षांत लाबार्थ्यांक हे येवजणेचो पुराय लाव मेळना, अशें चित्र सध्या दिसून येता. हाका लागून खूब जाण बेजार जाल्यात. कांय लाबार्थ्यांनी हे विशीं खात्या कडेन चवकशी केली तेन्ना तांकां सध्या सर्वेक्षम सुरू आशिल्ल्यान रकम प्रलंबीत आसा, अशी जाप मेळटा. हे संबंदांत कांय जाणांनी समाज कल्याण खातें तशेंच मुख्यमंत्री कार्यालय हॅल्पलायनीचेर कागाळी लेगीत केल्यात. दयानंद समाजीक सुरक्षा येवजणे खाला दिव्यांग भुरगीं आशिल्ल्या पालकांक म्हयन्याक 2500 रुपया, 90 ते 100 टक्के दिव्यांग भुरगीं आशिल्ल्या पालकांक म्हयन्याक 3500 रुपया, भुरगें नाशिल्ले विधवा बायलेक 2500 रुपया, ल्हान भुरगें 21 वर्सां परस उणें पिरायेचें आशिल्ले विधवा बायलेक 4000 रुपया तशेंच 60 वर्सां पिराये वयले विधवा बायलेक 2500 रुपया निधी दितात. गोंयांत मार्च 2025 चे अखेरेक हे येवजणे खाला सुमार 1 लाख 30 हजार व्यक्तींक लाव मेळटालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
