भांगरभूंय | प्रतिनिधी
नवी दिल्ली, खबरां संस्था ः फाटल्या सप्तकांत शेअर मार्केट चडटालें- देंवतालें. कांय काळा उपरांत बाजारांत क्रॅश जातकच दुसर्या दिसा वेवसायांत उदरगत जाली. सप्तकभर हातूंत अस्थिरताय आसून लेगीत मुंबय स्टॉक एक्सचेंजाच्या ३० शेअरांच्या सेन्सेक्सांत ७२८ आंकड्यांनी वाड जाली. मजगतीं, सेन्सेक्सांतल्या पयल्या १० कंपनीं मदीं स कंपनींचें बाजार मोल वाडलां, तातूंत देशांतल्या सगळ्यांत व्हडल्या विमो कंपनी एलआयसीक सगळ्यांत चड फायदो जाला. एलआयसी गुंतवणुकदारांनी फक्त पांच दिसांत सुमार ४५ हजार कोटी रुपया जोडल्यात.
फाटलें सप्तक शेअर बाजारा खातीर बरें आशिल्लें. पयल्या १० मोलादीक सेन्सेक्स कंपनींतल्या स कंपनींचें एकूण मार्केट कॅप १,८५,१८६.५१ कोटी रुपया आसा. ह्या काळांत ज्या स कंपन्यांक गुंतवणुकदारांचेर व्हड फायदो जाला तातूंत भारतीय जिवीत विमो म्हामंडळ म्हळ्यार एलआयसी पयले सुवातेर आसा. पीटीआयच्या म्हणण्या प्रमाण, एलआयसीचें मार्केट कॅप पांच दिसांच्या वेव्हारांत वाडून ७,४६,६०२.७३ कोटी रुपया जालां. हाचे प्रमाण एलआयसीच्या शेअरांत गुंतवणूक केल्ल्यांक ४४,९०७.४९ कोटी रुपया मेळ्ळे. फाटल्या शुक्रारा एलआयसीचे शेअर २.५१ टक्क्यांनी वाडून ११९० रुपयांचेर बंद जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
