भांगरभूंय | प्रतिनिधी
पणजी : दाबोळे रस्त्याच्या असुरक्षीत कामाक लागून दोगां जाणांचे जीव गेले. दोगांच्या मरणाक एमव्हीआर कंपनी जापसालदार आसून कंपनीच्या संचालकां आड पुलिसांनी खुनाच्या कलमा खाला फौजदारी गुन्याव नोंद करचो. धा दिसां भितर गुन्यांव नोंद जालो ना, जाल्यार पुलीस म्हासंचालकांक घेराव घालपाची शिटकावणी प्रदेश काँग्रेस अध्यक्ष अमीत पाटकार हांणी दिल्या. पुलीस म्हासंचालक आलोक कुमार हांची भेट घेवन काँग्रेसीन तांकां निवेदन भेटयलें.
मजगतीं, येरादारी मंत्र्यांच्या चेपणाक लागून एमव्हीआर कंपनीक रस्त्यांची कंत्राटां मेळटात. रस्त्यांच्या असुरक्षीत कामाक लागून लोकांचे जीव वचत आसात. राज्याच्या येरादारी मंत्र्यांक अटक करपा सयत तांचेर कारवाय जावपाची मागणी दक्षीण गोंयचे खासदार कॅप्टन विरियातो फर्नांडीस हांणी केली.
प्रदेश काँग्रेस अध्यक्ष अमीत पाटकार हांणी काँग्रेस हावजांत पत्रकार परिशद घेतली. ह्या वेळार दक्षीण गोंयचे खासदार कॅप्टन विरियातो फर्नांडीस, शरद चोपडेंकार आनी हेर पदाधिकारी हाजीर आशिल्ले.
दाबोळे एमव्हीआर कंपनीच्या घाळपणाक लागून दोगां जाणांचे जीव गेले. 4 मार्च 2025 दिसा रस्त्या वेलो बॅरिकेड पडून स्वप्नील चिंदरकार ह्या वीज खात्याच्या कर्मचाऱ्याक मरण आयलें. सुरक्षा उपायां मदीं घाळपणा आशिल्ल्यान ही दुर्घटना घडली. हाचे उपरांत 28 मे 2025 दिसा मारुती जाधव हाका अपघाती मरण आयले. रस्त्याचीं कामां सुरू आसतना फावो त्या प्रमाणांत सुरक्षेच्याे उपाय येवजण्यो घेवप बंधनकारक आसता. एमव्हीआर कंपनी कडल्यान सुरक्षेच्या उपायां कडेन दुर्लक्ष जाता. पुलिसांनी जो गुन्यांव नोंद केला, तो संचालकां आड ना. काम करपी अधिकाऱ्यांक लक्ष्य करपाचो हेत आसा. खून, बेजापसालदारपणाक लागून मरण ह्या कलमा खाला कंपनीच्या संचालकां आड धा दिसां भितर गुन्यांव दाखल करचो, अशी मागणी आसा. अपघाती मरण प्रकरणी खोलायेन चवकशी करची आनी सुरक्षा ऑडीट जाय मेरेन एमव्हीआरची कामां बंद दवरचीं, अशी मागणी आसा. तशेंच मरण आयिल्ल्या कुटुंबांक योग्य त्या प्रमाणांत भरपाय दिवची. एमव्हीआरच्या कामाक लागून हाचे पयलीं नाफ्ताची पायपलायन तशेंच उदकाची पायपलायन लेगीत फुटिल्ली आसा.
दाबोळी विमानतळाचेर विमाना खातीर जे इंधन येता ताची भायले भायर चोरी जाता. हाची चवकशी करून कारवाय करपाची मागणी प्रदेश काँग्रेस अध्यक्ष अमीत पाटकार हांणी केली. हो प्रस्न हांव संसदेंत मांडटलों अशें खासदार विरियातो फर्नांडिस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
