भांगरभूंय | प्रतिनिधी
एमव्हीआराक दंड घालूंक ना
पणजी : एमव्हीआर कंपनीच्या राष्ट्रीय म्हामार्ग तशेंच हेर रस्त्यांच्या कामाच्या दर्जाविशीं दुबावाची स्थिती आसली तरी एमव्हीआर कंपनीक ब्लॅकलीस्ट करपाचो सरकाराचो प्रस्ताव ना. कामा विशींच्यो कागाळी पयस करपा सयत कंपनीन आपल्या खर्चान रस्त्यांची दुरूस्ती केल्या, अशी लेखी जाप मुख्यमंत्री डॉ. प्रमोद सावंत हांणी दिल्या.
आमदार एल्टन डिकोस्टा हांच्या तारांकीत लेखी प्रस्नाक भौशीक बांदकाम खात्याचे मंत्री हे नात्यान डॉ. सावंत हांणी ही लेखी जाप दिल्या.
एमव्हीआर कंपनीच्या कामाच्या दर्जाविशीं दुबावाची स्थिती आसा. कामाचो दर्जो योग्य नाशिल्ल्यान रस्त्याचेर ङ्गोंडकुलां पडपा सयत काम सुरू आसतना पालसणी रस्त्याचेर कोसळपाच्यो घडणुको घडल्यात. हे कंपनीक दंड घाला काय? कंत्राटदाराक ब्लॅकलीस्ट करपाचो विचार आसा काय? असो लेखी प्रस्न केल्लो. एमव्हीआर कंपनीन कोसळिल्ल्यो पालसणी सारक्यो करपा सयत आपल्या खर्चान रस्त्याची दुरूस्ती केल्या. हाका लागून दंड घालूंक ना.
रायबंदर बायपास, पत्रादेवी ते करासवाडो म्हामार्ग, अस्नोडा बायपास मेळून ४ रस्त्यांची कामां एमव्हीआर कडल्यान पुराय जाल्यांत. ३ कामां सुरू आसा, असो उल्लेख जापेंत आसा. रस्त्यांच्यो निविदा नेम आनी कंत्राटदाराच्या ताके प्रमाण जारी जाता, अशें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
