भांगरभूंय | प्रतिनिधी
नीट आधारीत अभ्यासक्रम प्रवेश १ ऑगस्ट सावन
पणजी : एमबीबीएस, बीडीएस सयत नीट परीक्षेचेर आधारीत अभ्यासक्रमाच्या प्रवेशाची गुणवत्ता वळेरी ३० जुलय मेरेन जाहीर जातली. गुणवत्ता वळेरी जाहीर जाले उपरांत १ ऑगस्ट सावन प्रवेश फेरींक सुरवात जातली. तांत्रीक शिक्षण संचालनालया वतीन २४ जुलय मेरेन पात्रता फेरी आनी प्रवेश फेर्यांचें वेळापत्रक जाहीर करतले. तांत्रीक शिक्षण संचालनालयाचे उपसंचालक प्रदीप कुस्नूर हांणी ही म्हायती दिली.
वेवसायीक अभ्यासक्रमाचो विचार केल्यार पॉलीटेक्नीक (पदविका) तशेंच अभियांत्रिकी (बी. ई.) अभ्यासक्रमाची पयली फेरी जाल्या. वैजकी (एमबीबीएस), दंत (बीडीएस), आयुर्वेदीक (बीएएमएस), नर्सींग (बी. एससी.), होमीओपॅथी (बीएचएमएस) अभ्यासक्रमांक नीट परीक्षेच्या गुणांचेर प्रवेश दिता. प्रवेशा खाती इत्सूक विद्यार्थ्यां कडल्यान अर्ज घेवपा सयत नीट परीक्षेंतले गुणूय विद्यार्थ्यांनी सादर केल्यात. केंद्राचे मान्यताये बगर नीट अभ्यासक्रमाची प्रवेश प्रक्रीया सुरू करपाक मेळना. केंद्रान मान्यताय दिल्ल्यान आतां प्रवेश प्रक्रीया सुरू आसा.
फार्मसी (बी. फार्म.) अभ्यासक्रम प्रवेश नीट परीक्षेचेर आधारून नासता. तरी फार्मसी अभ्यासक्रमाची पात्रताय वळेरी २४ जुलय मेरेन, जाल्यार गुणवत्ता वळेरी ३० जुलय मेरेन जाहीर करतले. गुणवान विद्यार्थी एमबीबीएस, बीडीएस अभ्यासक्रमांक प्रवेश घेतात. हाका लागून नीटाचेर आधारीत प्रवेशा उपरांत हेर अभ्यासक्रमाच्यो कांय सुवातो रित्यो जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
