‘एमपीए’क गेट काडपाक लायलीच

भांगरभूंय | प्रतिनिधी

कृष्णा साळकार : अधिसुचोवणी जारी, बायणाकारांचें जैत

भांगरभूंय । प्रतिनिधी

वास्को : बायणा मुरगांव बंदर प्राधिकरणान (एमपीए) उड्डाण पुलाच्या मार्गाचेर उबारिल्ल्यो गेटी थंयच्यान फाटीं घेवच्यो तशेंच दुरगाची वणत थंयच्यान काडची, हे संबंदान दक्षीण गोंयची जिल्होधिकारी एग्ना क्लिटस हांणी बुधवारा 9 जुलयाक अधिसुचोवणी जारी केली. बायणाकारांच्या आदारान मेळयल्लें हें व्हड जैत, अशी प्रतिक्रिया वास्कोचे आमदार कृष्णा साळकार हांणी दिली.

त्यो वादग्रस्त गेटी फाटीं घेवपाची अधिसुचोवणी काडप हें आमचें जैत, अशें नगरसेवक दीपक नायक, नगराध्यक्ष गिरीष बोरकार हांणी सांगलें. तशेंच जे आमचेर टिका करताले, तांचीं तोंडां अधिसुचोवणेक लागून बंद जाल्या, अशेंय तांणी सांगलें.

21 जानेवारीक उड्डाण पुलाचें उक्तावण केंद्रीय मंत्री नितीन गडकरी हांणी केले उपरांत दुसऱ्याच दिसा म्हणल्यार 22 जानेवारीक ‘एमपीए’न थंय दुरीग आनी पुलाच्या मार्गाचेर दोन व्हड गेटी बसयल्यो. ते गेटींक लागून ‘एमपीए’ तो मार्ग केन्नाय बंद करपाक शकता, असो भंय निर्माण जाल्ल्यान बायणाकारांनी तिडक उक्तावन विरोध केल्लो. ह्या प्रकरणांत आमदार कृष्णा साळकार, दीपक नायक आनी हेरांनी त्यो गेटी थंयच्यान काडपाची मागणी केल्ली. ह्या प्रकरणांत मुख्यमंत्र्यांक निवेदनां दिल्लीं.

ह्या प्रकरणांत मुरगांव पालिका मंडळाची ‘एमपीए’च्या अधिकाऱ्यां वांगडा बसका जाल्ली. तातूंत सगलोच उपाय येवंक नाशिल्लो, पूण ते गेटींची आनी दुरगाची उंची उणी करपाचो प्रस्ताव ‘एमपीए’न दिल्लो, जो संबंदितांनी मान्य करूंक नाशिल्लो. 15 दिसां आदीं ‘एमपीए’न त्यो गेटी काडिल्ल्यान लोकांनी समाधान उक्तायल्लें, पूण दोन दिसां आदीं त्यो गेटी परतून थंय उबारल्यो. ह्या प्रकरणांत आमदार साळकार हांणी मुख्यमंत्री डॉ. प्रमोद सावंत हांची भेट घेवन तांचे मुखार थंयची समस्या मांडली. घातक रस्तो आनी अपघाताची सुवात जाल्या हें स्पश्ट करतना तांणी वास्कोचे येरादारी पुलीस निरिक्षक आल्वादो रॉड्रिग्स, निरिक्षक विक्रम नायक हांच्या अहवालाचो आदार घेतलो. ते उपरांत मुख्यमंत्र्यांनी जिल्होधिकारी कार्यालयाक योग्य ती कारवाय करपाची सुचोवणी केली. ते प्रमाण जिल्होधिकारी क्लिटस हांणी अधिसुचोवणी काडून त्यो गेटी योग्य सुवातेर व्हरपाक सांगल्यो.