भांगरभूंय | प्रतिनिधी
आमदार आंतोन वास हांची म्हायती
भांगरभूंय । प्रतिनिधी
मुरगांवः झुआरीनगरांतल्या एमईएस चौकांतलें येरादारी सिग्नल एका म्हयन्या सावन बंद आसा. ह्या प्रकरणांत कुठ्ठाळीचे आमदार आंतोन वास हांणी दखल घेवन संबंदीत कंपनीच्या प्रतिनिधीं कडेन चर्चा केली. ह्या वेळार तें येरादारी सिग्नल सोमार मेरेन आदले भशेन सुरू करपाचें उतर दिलें.
एमईएस चौकांत एके कंपनीन सीएसआर खाला येरादारी सिग्नलाची सुविधा दिल्या. राष्ट्रीय म्हामार्गा वयल्या ह्या चौकांत येरादारीची गर्दी आसता. थंय हे आदीं अपघात जाताले. पूण येरादारी सिग्नल बसयले उपरांत अपघात नियंत्रणांत आयिल्ले. मात फाटल्या म्हयन्यां सावन सिग्नल नादुरुस्त जाल्ल्यान वाहन चालकांची व्हड गैरसोय जावपाक लागल्या. कांय जाणांनी ती समस्या आमदार वास हांचे कडेन मांडली. ह्या प्रकरणांत थळावे पंच संतोष देसाय हांणी लक्ष घालून संबंदीत सरकारी यंत्रणेक पत्र धाडिल्लें आनी ताची जापूय तांकां मेळिल्ली.
आमदार वास हांणी थंयच्या येरादारी सिग्नलाची पळोवणी केली. ह्या वेळार तांच्या वांगडा सांकवाळचे उपसरपंच गिरीष पिल्ले, पंच संतोष देसाय, येरदारी पुलीस निरिक्षक शैलेश नार्वेंकार हाजीर आशिल्ले.
वास हांणी सांगलें, त्या सिग्नलाची देखभाल एक खाजगी कंपनी करताली. हें लक्षांत आयले उपरांत आपणे ते कंपनी कडेन संपर्क केलो. तांणी ती सुविधा आदले वरी दिवपाची सुचोवणी केल्या. कंपनींनूय सिग्नलाची दुरुस्ती करपाचें मान्य केलां. थंय कोणाचे तरी चुकीक लागून सेगीत येरादारी सिग्नल नादुरुस्त जाता. दुरुस्ती खातीर खूब पयसो खर्च करचो पडटा. फाटल्या म्हयन्यांत थंय भुंयगत वीज केबल घालतना तें सिग्नलाच्या सर्किटाचें आनी केबलांचें लुकसाण केल्लें. ताका लागून तें येरादारी सिग्नल बंद पडिल्लें. आतां कंपनीन सोमार मेरेन तें सिग्नल दुरुस्त करपाचें उतर दिलां, अशी म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
