भांगरभूंय | प्रतिनिधी
भांगरभूंय । प्रतिनिधी
पोरणे गोंयः पोरणे गोंय पंचायतीची धावजी हांगचे एमआरएफ शेडींत पंचायत वाठारांतलो कोयर हाडून दवोरतात. ताका लागून थळाव्या लोकांचे भलायकेचेर परिणाम जावपी भिरांत उक्तावण पंचायत ग्रामसभेंत ही शेड दुसरे कडेन व्हरपाची मागणी धावजीच्या लोकांनी केली. किरण नायक हांणी शेडीचो प्रश्न ग्रामसभेंत मांडलो.
धावजीचे लोक ओगी आसात म्हणून पंचायत मंडळान आमका गृहीत धरचें न्हय. शेडींत हाडून उडयतात त्या कोयराची सारकी हाताळणी जाता काय ना, हें पंचायत मंडळान पळोवचें आनी तें करप शक्य ना जाल्यार ही शेड दुसरे कडेन व्हरची अशेंं नायक हांणी आयतारा जाल्ले ग्रामसभेंत सरपंचाक सांगलें. मुंबय उच्च न्यायालयाच्या आदेशाक लागून ही तात्पुरती शेड उबारल्या. तिचे खातीर सुवात सोदपाचें काम सुरू केलां. एमआरएप शेडी खातीर जमीन विकती घेवपा खातीर सरकारान दिल्ल्या 50 लाख रुपयांच्या निधीचो उपेग करतले अशें पंचायत मंडळा वतीन सांगलें. शेड बांदपाक जाय तशी जमीन आसल्यार पंचायत मंडळाक सांगपाचें आवाहन सरपंचान ग्रामसभेंत लोकांक केलें.
बॅसिलिका बॉ जिजस चर्ची सामकार रस्त्यार पर्यटकांक घेवन येवपी वाहना पार्क करपाच्या प्रकाराक लागून येरादारी आडमेळे येतात. ह्या नो पार्किंक विभागांत वाहना पार्क करतल्यांचेर कारवाय करपाची मागणी ग्रामस्थांनी केली. पोरणे गोंय पुलीस वा येरादारी पुलिसांक कारवाक करपाक सांगचें अशें लोकांनी पंचायत मंडळाक सांगलें. बायंगिणी वाठार कोयर प्रकल्प उबारपाक अधिसूचीत केल्ले खातीर ग्रामसभेंत लोकांनी आवाज उठयलो. ह्या प्रकल्पा खातीर नव्यान पर्यावरण दाखलो घेवपाक सरकाराक सांगचें अशें लोकांनी पंचायत मंडळाक सांगलें. ह्या प्रकल्पांत 250 टन कोयराचेर प्रक्रिया करतले अशें सुरवेक सांगल्लें. मात आतां थंय 100 टन कोयराचेर प्रक्रिया करपाची मोख आसा. ते खातीर नव्यान पर्यारवण दाखलो घेवपाची गरज आसा अशें अरविंद कुमार सरन हांणी सांगलें. जेटी धोरणाक लेगीत ग्रामसभेंत विरोध उक्तायलो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
