भांगरभूंय | प्रतिनिधी
इंडीयन सुपर लिगेंत (आयएसएल) आयज येजमान एफसी गोवा आनी मुंबय सिटी एफसी हांचे मदीं जाल्ली मॅच गोलाविणें बादाबाद उरली.
मुंबय सिटीन दुसऱ्या अर्दांत आपल्या खेळाचो दर्जो वाडोवन एफसी गोवाचेर शेक दवरतना दिसलो. पूण, ताचे यत्न उण्या फरकान चुकले. नाजाल्यार निकाल मुंबय सिटी वटेन लागतलो आशिल्लो. कालच्या निकालान एफसी गोवाची फाटल्या तीन मॅची सावन चालू आशिल्ली जैताची धांव थांबली.
गुणतकट्यांत पयले सुवातेर आशिल्ल्या एफसी गोवाक आडावपाचें आव्हान मुंबय सिटी मुखार आशिल्लें. पूण, मुंबय सिटीन म्हयन्या उपरांत आयएसएलांत पुनरागमन करतना पयले मॅचींत बंगळुरू एफसीक 4-0 असो हारयिल्लो. ताका लागून ताचो आत्मविस्वास बरोच वाडिल्लो.
एफसी गोवा वतीन सातव्या मिनटाक कार्ल मॅकह्युजान केल्लो यत्न आडायलो. 11व्या मिनटाक मुंबय सिटीच्या ग्रेग स्टिवर्टाक अपेस आयलें. दोनूय पंगडां वतीन गोल करपाचे नेटाचे यत्न दिसले. बोरीस सिंग आनी नोआ सदौई हांणी एफसी गोवा खातीर उत्कृश्ट प्रदर्शन केलें, तांकां संदेश झिंगनाची बरी साथ मेळ्ळी.
पयल्या अर्दांत दोनूय पंगडांनी उचेंल्या पांवड्या वयलो खेळ केलो. एफसी गोवा वतीन दोन ऑन टार्गेट यत्न जाले, पूण, मुंबय सिटीक एक लेगीत यत्न ऑन टार्गेट करपाक जमलो ना. दुसऱ्या अर्दांत मुंबय सिटीन आक्रमक खेळ केलो.
50व्या मिनटाक दावे वटेच्यान आयिल्लो बॉल लालिंगझुआला छांग्टेन हेडर वरवीं गोलपोस्टाचे दिकेन मारलो. पूण, एफसी गोवाच्या गोलकीपरान येसस्वी रितीन ताचो यत्न फुकट घालयलो. 56व्या मिनटाक हॅण्डबॉलाक लागून मुंबय सिटीक फ्री कीक फावो जाली. पूण, स्टिवर्टाक गोल करपाक जमलो ना.
अखेरच्या 10 मिनटांत मुंबय सिटी वतीन गोल करपाचे उत्कृश्ट यत्न जाले. 87व्या मिनटाक जॉर्ज परेराचो यत्न तातूंतलो एक आशिल्लो. पूण, एफसी गोवान बचाव लेगीत तितकोच उत्कृश्ट रितीन केलो. पांच मिनटांच्या भरपाय वेळांत लेगीत दोनूय पंगडांक गोल करपाक जमलो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
