भांगरभूंय | प्रतिनिधी
इंडीयन सुपर लिगेंत (आयएसएल) आयज येजमान एफसी गोवा आनी जमशेदपूर एफसी हांचे मदीं मॅच जातली. एफसी गोवा अंदूंच्या हंगामांत पयले खेपे घरच्या मैदानाचेर म्हणल्यार फातोड्डेंच्या जवाहरलाल नेहरू स्टेडियमाचेर खेळटलो. थळाव्या प्रेक्षकांच्या तेंक्या नेटार बरें प्रदर्शन करून जैताची गाडी परतून रुळाचेर हाडपाचो ताचो यत्न आसतलो.
सध्या तीन मॅचींतल्यान स गूण मेळयत एफसी गोवान अंदूंच्या हंगामाक आश्वासक सुरवात केली. 2017-18 हंगामा उपरांत ताची ही सर्वोत्कृश्ट सुरवात आसा. ईस्ट बंगाल आनी चेन्नयीयन एफसी हांच्या आड सेगीत दोन जैतां जोडल्या उपरांत हैदराबाद एफसी आड ताका एका गोलान हार घेवची पडली.
एफसी गोवा वट्ट 972 दिसां उपरांत पयले खेपे आयएसएलाची मॅच घरच्या मैदानाचेर खेळटलो. एफसी गोवा सध्या गुणतकट्यांत पांचवे सुवातेर आसा. आयज जैत जोडलें जाल्यार तो थेट दुसरे सुवातेर पावतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
