भांगरभूंय | प्रतिनिधी
उमळशीक वाडोवपी फायनलींत ओडिशा एफसीक टायब्रेकरांत 3-1 अशा गोल फरकांनी हारोवन एफसी गोवान दुसरी भाऊसाहेब बांदोडकार फुटबॉल सर्तीचें वस्तादपण सेगीत दुसरे खेपे मेळयलें. गोंय फुटबॉल असोसिएनाच्या सहकार्यान फातोड्डेंच्या नेहरू स्टेडीयमाचेर सर्तीचें आयोजन केल्लें.
एफसी गोवाच्या जैतांत अणभवी गोलकीपर लक्ष्मीकांत कट्टीमणी पर्जळ्ळो. अंदूं एफसी गोवांत पुनरागमन करपी अणभवी लक्ष्मीकांत कट्टीमणीन पॅनल्टी शुटआवटांत जबरदस्त प्रदर्शन करून आपल्या पंगडाक वस्तादपण मेळोवन दिलें.
ह्या जैतान एफसी गोवाक 15 लाख आनी भाऊसाहेब बांदोडकार करंड फावो जालो. उप वस्ताद ओडिशा एफसीक रोख 8 लाख रुपयांचेर समाधान मानचें पडलें.
निर्धारीत वेळाच्या खेळांत दोनूय पंगड 3-3 अशे बरोबरींत उरिल्ले. मॅचीच्या 18व्या मिनटाक अहमद जाहूच्या पासाचेर ह्युगो बोमुसान गोल करून ओडिशा एफसीचें खातें उगडलें. ते उपरांत एफसी गोवान 34व्या मिनटाक बरोबरीचो गोल केलो. ब्रायसन फर्नांडीस आनी बोर्जा हार्रेरान रचिल्ले चालीचेर आर्मांद सादिकून हो गोल केलो.
ते उपरांत 41व्या मिनटाक बोर्जा हार्रेरा आनी आर्मांद सादिकून जोडपणान रचिल्ले चालीचेर डेझान ड्रॅझीकान गोल करून एफसी गोवाची आघाडी 2-1 अशी केली. ते उपरांत दुसऱ्या अर्दाचे सुरवातीक अहमद जाहून पॅनल्टीचेर गोल करून ओडिशा एफसीक 2-2 असो बरोबरींत हाडलो. ते उपरांत एफसी गोवाचे बचाव फळयेंत गोंदळ उप्राशिल्लो, ताचो फायदो घेत रहीम अलीन ओडिशा एफसीचो तिसरो गोल केलो.
ते उपरांत 88व्या मिनटाक एफसी गोवाच्या आर्मांद सादिकून ओडिशा एफसीचो गोलकीपर अनूजकुमाराक चकयत एफसी गोवा वतीन तिसरो गोल केलो आनी मॅच 3-3 अशी बरोबरींत हाडली.
मॅच बादाबाद उरिल्ल्यान निकाल लावपाक टायब्रेकराचो आदार घेवचो पडलो. टायब्रेकरांत एफसी गोवा वतीन आर्मांद सादिकू, बोर्जा हार्रेरा आनी डेझान ड्रॅझीक हाणें गोल केले, जाल्यार ओडिशा एफसी वतीन एकोडो गोल डायगो मॉरिसियोन केलो.
इनामां भेटवण सुवाळ्याक मुख्यमंत्री डॉ. प्रमोद सावंत मुखेल सोयरे म्हणून उपस्थीत आशिल्ले. तांणी जैतिवंतांक इनामां भेटयलीं. ह्या वेळार आमदार दिगंबर कामत, आमदार विजय सरदेसाय आनी गोंय फुटबॉल असोसिएशनाचे अध्यक्ष डॉ. कायतान फर्नांडीस उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
