भांगरभूंय | प्रतिनिधी
एफसी गोवान इंडियन सुपर लिगेंत (आयएसएल) काल येजमान जमशेदपूर एफसीक निमाण्या खिणाक गोल करून 2-2 असो बरोबरींत आडायलो. एफसी गोवान जबरदस्त खेळ केलो. जमशेदपूर एफसीन दोन खेपे आघाडी घेतली, पूण ताका जैत जोडपाक जमलें ना. सेगीत सात हारी उपरांत जमशेदपूर एफसीचो आत्मविस्वास उणो जाला अशें दिशिल्ले. पूण एफसी गोवाक अनपेक्षीत धपको बसलो. ताणें सगल्या विभागांनी उत्कृश्ट प्रदर्शन करतना एफसी गोवाची जैताची धांव आडायली. इतको सुंदर खेळ करून लेगीत जमशेदपूर एफसीक अखेरच्या मिनटाक बरोबरीचेर समाधान मानचें पडलें.
इकर गौरोत्स्केना मॅचींतलो स्टार खेळगडो थारलो. 31व्या मिनटाक ताणें आत्मघातकी गोला वरवीं जमशेदपूराक आघाडी मेळोवन दिली. अखेरेक ताणें एफसी गोवाक हारी पसून वाटायलो. जाल्यार दुसरो गोल 50व्या मिनटाक इशान पंडितान केलो.
जमशेदपूर एफसीन अंदूंच्या हंगामांत सामकी निर्शेणी हाडपी प्रदर्शन केलां. फाटल्यो सात मॅची तो हारला. प्ले ऑफांतले रेसींत येवपाक ताका उरिल्ल्यो सगल्यो मॅची जिखपाक जाय. आव्हान कायम राखपाचो निर्धार मनांत दवरून तो काल मैदानांत देंविल्लो.
घरच्या मैदानाचेर खेळटना ताणें बरी सुरवात केली. पयल्या 30 मिनटांच्या खेळांत ताणें तीन ऑन टार्गेट यत्न केले. तातूंतल्या एका यत्नाचेर गोल मेळ्ळो. 31व्या मिनटाक कॉर्नरा वयल्यान आयिल्लो बॉल वाटावपाच्या यत्नांत गौरोत्स्केनान हेडरा वरवीं बॉल स्वताच्याच गोलपोस्टांत घालो. ताका लागून जमशेदपूराक 1-0 अशी आघाडी मेळ्ळी. 36व्या मिनटाक चिमा चुक्कून सोंपी संद वगडायली. ताणें गोल केल्लो, जाल्यार जमशेदपूराक 2-0 अशी आघाडी घेवपाक मेळटली आशिल्ली.
गौरोत्स्केनान चूक सुदरायतना 38व्या मिनटाक एफसी गोवाक बरोबरी मेळोवन दिली. मकान छोटेच्या पासाचेर गौरोत्स्केनान हेडरा वरवीं गोल केलो.
पयल्या अर्दांतल्या खेळाचेर जमशेदपूराचो शेक दिसलो. दुसऱ्या अर्दाच्या 50व्या मिनटाक जमशेदपूरान आघाडी 2-1 अशी केली. एफसी गोवाच्या डिफॅण्डरान बॉल गोलकीपर धीरजा कडेन दिलो. पूण, तितक्यांत इशान पंडीत आयलो आनी ताणें धीरजाच्या पांया पोंदच्यान बॉल स्वता कडेन घेतलो. धीरज गोलपोस्ट सोडून बरोच मुखार आयिल्लो. ताचो फायदो घेत पंडितान सोंपो गोल करपाक येस मेळयलें.
जमशेदपूर हे मॅची वरवीं फाटल्या सात मॅचीं सावन चालू आशिल्लो हारीचो क्रम मोडटलो अशें दिशिल्लें. पूण, 89व्या मिनटाक गोल करून एफसी गोवान बरोबरी सादली. गौरोत्स्केनान दुसरोय गोल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
