एफडीएची म्हापश्यां, करासवाड्यार णव सुवातांचेर तपासणी
भांगरभूंय | प्रतिनिधी
कांय कडेन घाली बंदी, कांय जाणांक शिटकावणी
म्हापशें: अन्न आनी वखदां प्रशासनान (एफडीए) आयज थिये, माडेल, करासवाडो आनी म्हापशें मार्केट वाठारांत णव सुवातांचेर तपासणी केली. ह्या म्हयन्यांत अन्न उत्पादक, एक केटरर आनी फळ विक्रेत्यांचो आसपाव आशिल्लो. हे कारवायेंत कांय सुवातांचेर तेन्नाच बंदी घाली आनी कांय जाणांक सुदारपाच्यो सुचवण्यो केल्यो.
एफडीएची संचालक श्वेता देसाय हांच्या मार्गदर्शना खाला रिचर्ड नोरोन्हा, अमित मांद्रेंकार आनी डार्लन दिवकार हांच्या पंगडान ही तपासणी केली. हातूंत फरसाण, मिठाय आनी चिप्स करपी तीन उत्पादक, एक केटरर आनी पांच फळ विक्रेत्यांचो आसपाव आशिल्लो.
तपासणे मजगतीं, एक उत्पादक आनी एका केटरराक तांचे चुकींक लागून त्याच खिणाक वेवसाय बंद करपाचे आदेश दिले. जाल्यार हेर दोग उत्पादकांक सुधारणा करपाच्यो सुचवण्यो दिल्यो. तांचे कामाचे पद्धतींत व्हड सुदारणा करप गरजेचें दिसता.
गिराकांचे भलायकेचे सुरक्षितताये खातीर विवीध फळांचे विक्रेत्यां कडल्यान नमुने घेतले. ते प्रयोगशाळेंत तपासणे खातीर सध्या धाडल्यात. एफडीए पंगडान म्हापशें मार्केटांतल्या विक्रेत्यांचेर सेगीत लक्ष दवरपाचो निर्धार उक्तायलो. नितळसाण आनी गुणवत्तेंत कसलेच तरेची तडजोड करचे ना, अशें सांगलें. खंयचोय विक्रेतो वा उत्पादक जर गैरप्रकार, बेकायदेशीर गजाली करतना दिसत जाल्यार एफडीए कडेन संपर्क करचो, अशें कळीत केलां. पणजी – 0832- 2459226; 2459230, ईमेल – [email protected] मडगांव – 0832- 2703766, ईमेल- [email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
