भांगरभूंय | प्रतिनिधी
९ आस्थापनांचेर केली कारवाय
पणजी : राज्यांतल्या तापमानांत वाड जाल्ल्यान जेवणाचे जिन्नसूय रोखडेच पेड्ड्यार जातात. अशे जिन्नस खाल्ल्यान भलायकेच्यो समस्याय वाडटात. मजगतीं, एफडीएन हो आनी नितळसाणेचो मुद्दो लक्षांत घेवन शेनवारा पर्वरे भागांत विशेश मोहीम राबयली. ह्या वेळार हांगा खावपाच्या जिन्नसाची विक्री करपी वट्ट ९ आस्थापनांची पळोवणी केली. तांतल्या ३ रेस्टॉरंटांचेर कारवाय केली.
तीन रेस्टॉरंटांक कारवायेक मुखार वच्चें पडलें, तांचे रांदचे कुडींत एफडीएच्या पंगडाक नितळसाणेचो उणाव जाणवलो. पंगडान रोखडेच तांकां काम बंद दवरपाचे आदेश दिले, गरजेच्यो सुधारणा करून ताचो अहवाल एफडीएच्या कार्यालयांत सादर करपाक सांगलें.
हीं तीन रेस्टॉरंटां पर्वरेच्या डेल्फिनोच्या फाटल्यान कार्यरत आशिल्लीं. हेरांक फएसएसएआयच्या मानक नेमां खाला विशिश्ट सुचवण्यो दिल्यात. मजगतीं खावपाचे जिन्नस विक्री करपी सगल्या आस्थापनांनी वाठारांतली नितळसाण आनी खावपाच्या जिन्नसांची गुणवत्ता हाचे कडेन आडनदर करची न्हय अशे खर निर्देश एफडीएन दिल्यात.
संचालक श्वेता देसाय हांच्या मार्गदर्शनाखाला नियुक्त अधिकारी रिचर्ड नोरोन्हा, अन्न सुरक्षा अधिकारी अमित मांद्रेंकार आनी लेनीन देसा हांच्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
