भांगरभूंय | प्रतिनिधी
खबरां संस्था
लंडनः मँचेस्टर सिटीन एफ कप हे संवसारांतले सगल्यांत पोरणे फुटबॉल सर्तीची किताबी लडत जिखली. 151 वर्सांचे हे सर्तींचे फायनलींत मँचेस्टर सिटीन आपले कडवे प्रतिस्पर्धी मँचेस्टर युनायटेडाक 2-1 अशें हारयलें. हे सर्तींतले सिटीचें हें 7वे वस्तादपण आसा. हाचे पयलीं 2019 वर्सा तांणी ही सर्त जिखिल्ली.
लंडनांतल्या वेम्ब्ली स्टेडियमाचेर शेनवारा जाल्ली ही फायनल पळोवपाक लाखांनी फुटबॉल मोगी आशिल्ले. भारताचो क्रिकेटीयर विराट कोहली, ताची घरकान्न बॉलिवुड अभिनेत्री अनुष्का शर्मा, शुभमन गिल आनी विस्फोटक बॅट्समन सूर्यकुमार यादव फायनलीक आयिल्ले. विराट- अनुष्काक मँचेस्टर सिटी आनी प्युमा ब्रँडान मॅच पळोवपाक येवपाक आमंत्रीत केल्लें,
गुंडोगनाचो फास्ट गोल
मँचेस्टर सिटीचो मिडफील्डर इलकाए गुंडोगनान एफए कप इतिसहासांतलो सगळ्यांत फास्ट गोल केलो. मॅच सुरू जातगीर गोलकीपरा कडेन बॉल गेलो आनी ताणे तो फुडें मारलो तेन्ना गंडोगान बॉक्सच्या भायल्यान शानदार वॉली मारून व्हो गोल केलो. अशे तरेन मॅचीचे सुरवातेकूच मँचेस्टर सिटीन युनायटेडाचेर आघाडी घेतली. मॅचींतलो दुसरो गोल लेगीत गुंडोगनानूय केलो. मॅचीच्या दुसऱ्या हाफांत 51व्या मिनटाक गुंडोगनान बॉक्साच्या भायल्यान शॉट मारलो जो सरळ मँचेस्टर युनायटेडाच्या गोन नेटांत गेलो. गोलकीपर डेव्हीड डे व्हो शॉट आडावपाक शकलो ना.
युनायटेडाचो गोल पेनल्टीचेर
मँचेस्टर युनायटेडाचो एकसुरो गोल 33व्या मिनटांक पेनल्टीचेर जालो. 32व्या मिनटाक मँचेस्टर सिटीच्या खेळगड्याचो आपल्याच बॉक्सांत बॉलांत हात लागलो. ताका लागून युनायटेडाक पेनल्टी मेळ्ळी. ताचेर ब्रूनो फर्नांडीसान चूक करनास्तना गोल केलो.
एफए कप सर्त सगल्यांत चड फावट जिखपाचो विक्रम आर्सेनलाच्या नांवार आसा. तांणी 14 फावट ही सर्त जिखल्या. दुसरे सुवातेर मँचेस्टर युनायटेड आसा. तांणी 12 फावट ही सर्त जिखल्या. चेल्सी आनी टॉटनहम हॉट्सपर देरकी 8 फावट चॅम्पियन थारल्यात. संवसारांतल्या सगल्यांत पोरणी एफए कप केनिंगटन ओव्हल हे क्रिकेट मैदानाचेर खेळल्ली. 1871-72च्या सिझनांत ती जाल्ली. त्या वेळार हे सर्तींत 12 पंगडांनी वांटो घेतिल्लो. वाडरर्सनान रॉयल इंजिनियर्स पंगडाक 1-0 अशें हारयल्लें. केनिंगटन ओव्हलाचेर सध्या फकत क्रिकेट मॅची जातात.
1877 वर्सा सर्तींत 40 पंगडांनी वांटो घेतिल्लो. ते उपरांत 1880 उपरांत सर्तींत शंबरां परस चड पंगड वांटेकार जाल्ले. 1923 वर्सा पयले फावट वेम्ब्लींत फायनल जाल्ली. 1913 वर्सा क्रिस्टल पॅलेस हांगा जाल्ले फायनलींत 1 लाख 21 हजार फुटबॉल मोगी फायनल पळोवपाक आयिल्ले.
——————————————————–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
